प्रविधिको प्रयोग गर्दै प्रेस युनियन सुनसरीको बैठक, पत्रकारलाई मास्क र सेनिटाइजर वितरण गर्ने

इटहरी : नेपाल प्रेस युनियन सुनसरीले प्रविधिको प्रयोग गर्दै बैठक बसेको छ । पवन अधिकारीको अध्यक्षतामा बसेको बैठकमा कार्यसमितिका पदाधिकारी सहित पूर्व अध्यक्षहरुको पनि सहभागिता रहेको थियो ।
जुम एप्समार्फत युनियन कार्यसमितिको बैठक बसिएको हो । बैठकमा पत्रकारहरुका लागि मास्क र सेनिटाइजर वितरण गरिने निर्णय भएको छ । त्यस्तै, अहिलेको अवस्थामा विभिन्न मानिसहरुले पात्रो हेर्न नपाईरहेको अवस्थामा डिजिटल पात्रो समेत बनाउँने निर्णय भएकाले केही दिनमै उक्त पात्रो प्रकाशित हुने र लाखौँ मानिसहरुले उक्त पात्रो डाउनलोड गरेर हेर्न सकिने अध्यक्ष अधिकारीले बताए ।

उनले भने, ‘पछिल्लो समय प्रविधिको जमाना फास्ट रहेकाले अहिले मुलुकमा लकडाउन छ, सोही कारण हामीले डिजिटल पात्रो बनाउँने तयारी थालेका हौँ ।’
उनले डिजिटल पात्रो सहित अहिले लकडाउनमा पत्रकारलाई समस्या परेको खण्डमा आँफूले जस्तोसुकै अवस्थामा पनि सहयोग गर्ने बताए । उनले भने, ‘फिल्डमा खटिने पत्रकारका लागि मैले भर्खरै विराटनगर गएर १ हजार मास्क र केही सेनिटाइजर लिएर आएको छु, हामी यसलाई भोलीबाटै वितरण गर्ने तयारी गरिरहेका छौँ ।’ अधिकारीका अनुसार अहिले पत्रकारहरुको बीमाको पनि कुरा उठेका कारण लकडाउँनपछि यसलाई मध्यनजर गर्दै पत्रकारहरुका लागि दुर्घटना बीमाको योजना ल्याउँने तयारी गरिएको छ ।

उक्त बैठकमा प्रेस युनियन सुनसरीका पूर्व अध्यक्षहरु कृष्ण अधिकारी, चेतन धमला, गणेश निरौला लगायतको सहभागीता रहेको थियो । उनीहरुले प्रेस युनियनले श्रमजीवि पत्रकारको हकहितका लागि सधैँ काम गर्न सुझाव दिएका थिए । जिल्लामा क्रियाशिल पत्रकारहरुका बीमाको कुरालाई व्यवस्थित गर्ने तथा आवश्यक राहत पनि वितरण गरिने उनको भनाई थियो । पत्रकारको हकहितका लागि काम गर्ने उनले प्रतिबद्धता जनाए ।