रोटरी क्लब अफ इटहरीद्धारा स्वास्थ्य संस्थालाई पिपिई हस्तान्तरण

इटहरी : रोटरी क्लब अफ इटहरीले विभिन्न स्वास्थ्य संस्थालाई पिपिई उपलब्ध गराएको छ ।
इटहरी उपमहानगरपालिकाको संयोजनमा वितरण गर्ने गरी विभिन्न स्वास्थ्य संस्थाहरुलाइ रोटरी क्लब अफ इटहरीले पिपिइ उपलब्ध गराएको हो । क्लबका पूर्व अध्यक्ष लक्ष्मी धितालले इटहरी उपमहानगरपालिकाका प्रमुख द्वारिकलाल चौधरीलाई रोटरीको तर्फबाट २० थान पिपिइ हस्तान्तरण गरिन् । रोटरीले इटहरी उपमहानगरपालिकालाई हस्तान्तरण गरेको पिपिइ मध्ये तीन थान नगर प्रमुख चौधरीले नेपाली सेनाको व्यवस्थापनमा मोरङ्गको टाँडीमा रहेको क्वारेन्टाइनका लागि प्रदान गरेका थिए । त्यसैगरी उपमहानगरपालिकाले प्राप्त गरेको उक्त पिपिइमध्ये इटहरी अस्पताल, जनता क्पाम्पसमा रहेको क्वारेन्टाइन र इनरुवा अस्पतालका लागि तीन–तीन थान पिपिइ उपलब्ध गराएको जनाएको छ ।

यस वाहेक नेपाल रेडक्रस सोसाइटी इटहरी उपशाखाको एम्बुलेन्स चालकहरुका लागि दुई थान तथा खनार स्वास्थ्य चौकी र परिवार स्वास्थ्य केन्द्रका लागि पनि रोटरीले उपमहानगरपालिकामार्फत एक–एक थान पिपिइ उपलब्ध गराएको क्लबकी अध्यक्ष अनिता अधिकारीले बताईन् । रोटरी क्लबले सुनसरीको भारतीय सिमावर्ती क्षेत्रको सुरक्षामा परिचालित सशस्त्र प्रहरी बलको कप्तानगञ्ज र हरिपुर पोष्टका लागि पनि दुइ–दुइ थान पिपिइ उपलब्ध गराएको जनाएको छ ।
यस अघि पनि रोटरी क्लब अफ इटहरीले इटहरीस्थित नेपाली सेनाको सैनिक अस्पताल, धरानस्थित वीपी कोइराला स्वास्थ्य विज्ञान प्रतिष्ठान, विराटनगरमा रहेको कोशी अञ्चल अस्पताल लगायतका स्वास्थ्य संस्थाहरुलाइ पिपिइ लगायतका विभिन्न स्वास्थ्य सामग्रीहरु प्रदान गरेको थियो ।