इटहरी : सुनसरीको कोशी गाउँपालिका–१ पुरी टोलस्थित चेकपोइन्टमा सशस्त्र प्रहरीको गोली प्रहारबाट मृत्यु भएका सिटी सफारी चालक विजय साहको शव परीक्षणका लागि बीपी कोइराला स्वास्थ्य तथा विज्ञान प्रशिक्षण प्रतिष्ठान धरान ल्याइएको छ।
भारतबाट नेपालतर्फ आउँदै गरेको प्र.१-०२-००३ ह ३३१७ नम्बरको सिटी सफारी चेकजाँच गर्ने क्रममा विवाद उत्पन्न भएपछि ड्युटीमा रहेका सशस्त्र प्रहरीले गोली प्रहार गरेका थिए।
गोली लागेर सिटी सफारी चालक, कोशी गाउँपालिका–१ का ४५ वर्षीय साहको घटनास्थलमै मृत्यु भएको थियो।
घटनापछि पीडित परिवार तथा स्थानीयवासीले असन्तुष्टि जनाउँदै सुनसरीको लौकही चोकमा प्रदर्शन गरेका थिए।
सोही घटनाको सन्दर्भमा बिहीवार जिल्ला प्रशासन कार्यालय सुनसरीमा प्रमुख जिल्ला अधिकारी बासुदेव घिमिरेको नेतृत्वमा सुरक्षाकर्मी, पीडित परिवार तथा स्थानीय तहका जनप्रतिनिधिसहितको उपस्थितिमा छलफल भई घटनाको छानबिन, क्षतिपूर्ति र पीडित परिवारलाई राहतलगायत विषयमा ५ बुँदे लिखित सहमति भएको हो।
सहमति पश्चात् मृतकको शवको सम्पूर्ण कानुनी प्रक्रिया पूरा गरी शव परीक्षणका लागि घोपा धरान ल्याइएको जनाइएको छ।
साथै, गोली प्रहार गर्ने सशस्त्र प्रहरी कर्मचारीलाई नियन्त्रणमा लिई घटनाबारे थप अनुसन्धान भइरहेको जनाइएको छ।
यो पनि – सशस्त्रको गोलीबाट मृत्यु भएपछि सुनसरी तनावग्रस्त, छानबिन समिति गठन
Discussion about this post