इटहरी : इटहरीमा जारी तेस्रो अन्तर कलेज टि २० क्रिकेट प्रतियोगितामा इटहरीको सुष्मा गोदावरी कलेज र विराटनगरको कान्तिपुर कलेज विजयी भएका छन् ।
पहिलो खेलमा सुष्मा कलेज इटहरीले कस्तुरी कलेजलाई ६१ रनले पराजित गरेको छ । टस हारेर ब्याटिङ गरेको सुष्मा निर्धारित २० ओभरको खेलमा २ विकेट गुमाई १ सय ३९ रन बनाएको थियो ।
जसमा प्लेयर अफ दि म्याच कृष्ण सिवाकोटीले अविजित ४७ रन बनाउँदा अनिल बस्नेतले पनि अविजित ४३ रनको योगदान दिए । कस्तुरीका यस्वन्त मेहता र अर्पन अधिकारीले समान १-१ विकेट लिए ।
१४० रनको लक्ष्य पछ्याएको कस्तुरीले पुरै ओभर खेल्दै ७ विकेट गुमाएर ७८ रन बनाउन सक्यो ।
कस्तुरीका यश्वन्त मेहताले २३ रन जोड्दा अमन मिश्राले १५ रनको योगदान दिए । सुष्माका स्वर्णिम कँडेल २ विकेट लिँदा जेम्स सेञ्चुरी र सागर डोटेलले पनि २-२ विकेट लिए ।
मौसम प्रतिकुलका कारण दोस्रो खेल २० ओभरबाट घटाएर १६ ओभरमा खेलाइएको थियो ।
विराटनगरको कान्तिपुर कलेजले जनता स्कुल इटहरीलाई २५ रनले पराजित गरेको छ।
टस जितेर ब्याटिङ गरेको कान्तिपुरले निर्धारित ११ ओभरमा सवै विकेट गुमाइ १ सय १८ रन बनाएको थियो। कान्तिपुरका प्लेयर अफ दि म्याच निश्चल गुप्ताले ४९ रन बनाउँदा मनु दासले २० रन र जयप्रकाश यादवले १९ रनको योगदान दिए ।
जनताका एसान खानले ४ विकेट लिँद्या अंकित दासले ३ विकेट लिए।
१ सय १९ रन को लक्ष पछ्याएको जनताले सवै विकेट गुमाई ९३ रन मात्र बनाउँन सक्यो । जनताका अंकित दासले २७ रन बनाउँदा प्रशान्त नेपालले १९ रनको योगदान दिए ।
कान्तिपुरका खेमराज हमाल ले २ विकेट लिँदा अर्विन मण्डल, सन्तोष गुप्ता र रामरतन यादवले १-१ विकेट लिए । पुस २६ गतेसम्म चल्ने प्रतियोगितामा कोशी प्रदेशका झापा, मोरङ र सुनसरीका गरि १२ कलेजको सहभागिता रहेको छ ।
विजेताले २५ हजार र उपविजेताले १५ हजार रुपैयाँ पुरस्कार प्राप्त गर्नेछन् ।
Discussion about this post