विराटनगर : विराटनगर महानगरपालिका–१४ स्थितमा आज (मंगलबार) अपराह्न दुर्घटनामा परेर बाबु–छोरीको मृत्यु भएको छ ।
ग्यास बुलेटको ठक्करबाट साइकलमा सवार बाबु–छोरीको मृत्यु भएको हो ।
मोरङ ट्राफिक प्रहरीका अनुसार विराटनगरबाट रानीतर्फ जाँदै गरेको एएस ०१ एफसी ०९१९ नम्बरको एलपी ग्यास बुलेटले साइकलमा यात्रा गरिरहेका दुवैजनालाई ठक्कर दिएको थियो ।
दुर्घटनामा परेर साइकलमा सवार विराटनगर–१४ जतुवाका ४५ वर्षीय शिवचरण ठाकुर र उनकी छोरी १३ वर्षीया गरिमा ठाकुरको मृत्यु भएको प्रहरीको भनाइ छ ।
घटनापछि ग्यास बुलेट र चालक भारत घर भएका ४५ वर्षीय रामलाल सहनीलाई प्रहरीले नियन्त्रणमा लिएको छ ।
घटनाबारे थप अनुसन्धान भइरहेको प्रहरीको भनाइ छ ।
Discussion about this post