तरहरा
तरहरामा रहेको ऊँ डान्स सेन्टरले इटहरीमा रहेका विद्यालयहरुमा अध्ययनरत विद्यार्थीहरुको लागि अन्तर विद्यालय स्तरीय एकल नृत्य प्रतियोगिताको आयोजना गरेको छ ।
सेन्टरले ‘इटहरी स्कुल च्याम्प शृङ्खला २’ को शनिबार तरहरामा प्रतियोगिता आयोजना गरेको हो । यसअघि पनि गत साल सेन्टरले पहिलो पटक स्कुल च्याम्प गराएको ऊँ डान्स सेन्टरका प्रबन्ध निर्देशक प्रेम चौधरीले बताए । ‘कक्षा १ देखि १० सम्म अध्ययनरत बिद्यार्थीको क्षमता अभिबृद्धि सँगै उनीहरुको प्रतिभालाई उजागर गर्नका निम्ति हामीले कार्यक्रमको आयोजना गरेका हौँ,’ चौधरीले भने, ‘विद्यार्थीको प्रतिभालाई तालिमको माध्यमबाट उत्कृष्ट कलाकारको रुपमा उभ्याउनका लागि हामीले यो कार्यक्रमको आयोजना गरेका हौँ ।’ चौधरीका अनुसार शनिबारको प्रतियोगितामा जुनियर र सिनियर तर्फ गरी विद्यार्थीहरुलाई नृत्यमा सहभागी गराईएको थियो ।
जुनियरतर्फ १५ जना सहभागी रहेका थिए भने सिनियरतर्फ १० जना विद्यार्थी सहभागी रहेको उनको भनाई थियो । प्रतियोगितामा जुनियर तर्फ होराइजन एकेडेमीकी प्रेरणा बिष्ट प्रथम, पूर्वाञ्चल बोर्डिङकी कन्चन बानियाँ द्धितीय र ज्ञानदर्पण एकेडेमीकी अञ्जली तामाङ तृतीय भईन् । उनीहरुले क्रमशः २० हजार, १५ हजार र १० हजार रुपैँया सहित ट्रफि र प्रमाणपत्र हात पारे भने अन्य सहभागीहरुलाई विभिन्न टाइटल पुरस्कार प्रदान गरियो ।
त्यस्तै, सिनियर तर्फ महेन्द्र माविमा अध्ययनरत समीक्षा बस्नेत प्रथम, प्याराडाइस बोर्डिङ स्कुलकी सबिना बन द्धितीय र राष्ट्रिय माविका करण चौधरी तृतीय भए । उनीहरुले क्रमशः २० हजार, १५ हजार र १० हजार रुपैँया सहित ट्रफि र प्रमाणपत्र हात पारे भने अन्य सहभागीहरुलाई विभिन्न टाइटल पुरस्कार प्रदान गरिएको थियो ।
कार्यक्रमका प्रमुख अतिथि हाँसपोसा सामुदायिक बनका अध्यक्ष महेन्द्र गिरीले डान्स सेन्टरले कलाकार उत्पादन गरेको भन्दै प्रसंसा गरे ।
उनले भने, ‘यो कार्यक्रम गर्नु समाजका लागि अतुलनीय योगदान हो, यो डान्स सेन्टरका कारण तरहरामा महत्वपूर्ण योगदान पुगिरहेको छ ।’ उनले स्थानीय स्तरमा नै कलाकार जन्मिरहेकाले उनीहरुको संरक्षण र प्रबर्धनका निम्ति आँफूहरु गम्भीर रहेको बताए । ‘अभिभावकले छोराछोरीको मनोभावना अनुसार काम गर्न नसकिरहेको अवस्था छ,’ उनले भने, ‘हामी सबैले ठूलो मानिस बनोस् भन्छौं तर उनीहरुको इच्छा बुझ्न सकेनौँ ।’ गिरीले आफ्ना छोराछोरीको मनोभावना बुझेर उनीहरुलाई उत्प्रेरित गर्नुपर्नेमा जोड दिए ।
कार्यक्रममा लोकचन्द्र श्रेष्ठ (एलसी), पनिता तामाङ र रेश्मा राई निर्णायक रहेका थिए । आयश्वर लिम्बूको सभाध्यक्षमा सम्पन्न कार्यक्रम उत्तम गिरीले सञ्चालन गरेका थिए ।
Discussion about this post