धरान । नेपाली कांग्रेसका सभापति शेरबहादुर देउवाले प्रजातन्त्र संकटमा परेको बताएका छन् ।
७० औँ प्रजातन्त्र दिवसको अवसरमा धरानमा आयोजित कार्यक्रममा सम्बोधनको क्रममा बुधबार देउवाले देशमा जनताको बलमा कांग्रेसको आन्दोलबाट २००७ सालमा प्राप्त गरिएको प्रजातान्त्र संकटमा परेको बताएका हुन् ।
वर्तमान केपी शर्मा ओली नेतृत्वको कम्युनिस्ट सरकारको रबैयाले देशमा प्रजातान्त्रिक व्यस्यस्था संकटमा परेको उनको आरोप रहेको थियो ।
देउवाले भने, ‘कुनै पनि बहानामा जनताको प्रजातन्त्रिक अधिकारलाई खोस्न पाइदैन । जनताको बोल्न पाउने अधिकार, संगठन गर्न पाउने अधिकार हुन्छ, सार्वभौमसत्ता सम्पन्न जनता हो शक्तिको केन्द्र जनता हो, त्यसैले प्रजातन्त्रका लागि लडेका जनताको पक्षमा सरकार छैन ।’
पूर्वप्रधानमन्त्री समेत रहेका देउवाले देशलाई विकास र समृद्धिको बाटोमा अघि बढाउन राष्ट्रिय एकताको आवश्यकता रहेको तर्क गरे । ‘राष्ट्रिय एकता भयो भने देशमा गरिबी हट्छ,’ उनले भने, ‘देश विकास र समृद्धिको बाटोमा अघि बढाउँनका लागि अहिले राष्ट्रिय एकताको आवश्यक रहेको छ ।’
एक फरक प्रसंगमा उनले धरानलाई धार्मिक पर्यटकीय क्षेत्रको रुपमा अब्बल रहेको बताए । उनले धरानको पर्यटकीय क्षेत्रका निम्ति धरान उपमहानगरले सकारात्मक काम गर्न आग्रह समेत गरे ।
कार्यक्रममा वरिष्ठ नेता रामचन्द्र पौडेलले अहिलेको सरकार नीतिगत भष्ट्रचारमा लिप्त रहेको आरोप लगाए । ‘अहिलेको सरकारले नीतिगत भ्रष्टाचार गरिरहेको छ,’ उनले भने, ‘जनता चनाखो हुने बेला आएको छ ।’ महामन्त्री डा. शशांक कोइरालाले सबै मिलेर कांग्रेसलाई लयमा फर्काउनका लागि अपिल गरे ।
पार्टीका शीर्ष नेताहरु एक भएर हिड्नको बिकल्प नरहेको उनको तर्क थियो । नेपाली कांग्रेस केन्द्रीय सहमहामन्त्री प्रकाश शरण महत, केन्द्रीय संदस्य ज्ञानेन्द्र बहादुर कार्की, मीन विश्वकर्मा, रामहरि खतिवडा, डा. डिला संग्रौला, भीष्मराज आमदाङ्गे लगायतले बोल्दै वर्तमान सरकारले जनता निराश भएको बताए । उनीहरुले सरकारले गरेका काम निराशाजनक रहेको बताउँदै कांग्रेस एक भएर जनताको हितका निम्ति काम गर्न तयार रहेको बताए ।
प्रदेश नं का प्रमुख प्रतिपक्षी दलका नेता एवम नेपाली कांग्रेस सुनसरी जिल्ला सभापति राजिब कोइरलाले प्रयाप्त उपलब्धीको रक्षा कांग्रेसले गर्नु पर्ने बताए । धरानका मेयर तिलक राईले आँफूले धरानमा चुनाव जितेपछि जनताको हितका निम्ति काम गर्दै आएको बताए । उनले भने, ‘मैले चुनाव अगाडि गरेका घोषणा पूरा हुँदै आएका छन्, म सधैँ धरान र धराने जनताको पक्षमा लागिरहनेछु ।’
Discussion about this post