दोलखाकी बालिका खड्का (राई) ले प्रदेश १ का मुख्यमन्त्री शेरधन राईविरुद्ध जिल्ला अदालत काठमाडौंमा मुद्दा दायर गरेकी छिन्।
मुख्यमन्त्री राईले आफूमाथि घरेलु हिंसा, शारीरिक यातना र यौन दुर्व्यवहारको प्रयास गरेको भन्दै उनले शुक्रबार मुद्दा दायर गरेकी हुन्। खड्काले आरोपपत्रमा मुख्यमन्त्री राई आफ्नो पति भएको दाबी गर्दै आधा अंश माग गरेकी छन्।
‘मुलुकी देवानी संहिता, २०७४ को दफा ६७ अनुसार विपक्षी पति र म बीच एक अर्कालाई पति पत्नीको रूपमा स्वीकार गरी विवाह भएको हुँदा ऐ। संहिताको दफा २०५, २०६, २०९, २११, २१२, २१३ समेतका आधारमा प्रस्तुत फिराद गर्न आएकी छु,’ बालिकाले दायर गरेको मुद्दामा भनिएको छ,‘अंशबण्डा गर्ने सम्पत्तिको फाँटवारी देखाई फिराद गर्नु पर्नेमा विपक्षी जिम्माको सम्पत्ति मलाई हाल जानकारी नभएको र मसँग बण्डा गर्ने कुनै पनि सम्पत्ति नभएको हुँदा संहिताको दफा २२१, २२२, २२३, २२४, २२५ समेतका आधारमा बण्डा गर्ने सम्पत्तिको तायदाती फाँटवारी माग गरी फिराद परेको अघिल्लो दिनलाई मानो छुट्टिएको मिति कायम गरी जम्मा सम्पत्तिलाई २ भाग गरी १ भाग अंश दिलाइ चलन चलाई पाऊँ।’
बालिकाले मुख्यमन्त्री राईलाई २०७१ सालदेखि चिनेको बताएकी छन्, जतिबेला राई नेकपा एमालेका वैकल्पिक पोलिटब्युरो सदस्य थिए भने बालिका युवा संघ नेपालको केन्द्रीय सदस्य र महिला युथ फोर्सको केन्द्रीय सचिव। राईसँग पार्टीगत कामको सिलसिलामा भेटघाट बाक्लिदा माया बस्न गएको बालिकाले बताएकी छन्।
मुख्यमन्त्री राईसँग ‘लिभिङ टुगेदर’ गरी बसेको उनको जिकिर छ। राईले विद्यादेवी भण्डारी पहिलोपटक राष्ट्रपति नियुक्त भएको दिन बेलुका रात्रिभोजमा आफूमाथि मदिराको जोशमा यौन दुर्व्यवहार गर्न कोसिस गरेको आरोप बालिकाले लगाएकी छन्। उक्त घटनापछि राईले आफूलाई ‘हामी लोग्ने स्वास्नी हौं’ भनी फकाएकोसमेत उनले आरोपपत्रमा उल्लेख गरेकी छन्।
राई सूचना तथा सञ्चारमन्त्री हुँदा आफू तत्कालीन प्रधानमन्त्री केपी शर्मा ओलीको निजी स्वकीय अधिकृतको रूपमा काम गरेको उनले जनाएकी छन्। त्यतिबेला राई र आफूबीच शारीरिक सम्पर्क कायम भएको उनले स्वीकारेकी छन्, तर विवाह दर्ता गर्न राईले नमानेको आरोप उनले लगाएकी छन्।
राईले आफूलाई २०७२ सालदेखि २०७४ सम्म काठमाडौं बूढानीलकण्ठ नगरपालिका गोल्फुटारमा डेरामा राखेको उनले खुलाएकी छन्। विवाहको लागि पटक(पटक आग्रह गरेपछि राईले आफूलाई २०७५ कात्तिक महिनादेखि उक्त डेराबाट निकाला गरिएको बालिकाले बताएकी छन्।
राई मुख्यमन्त्री भएपछि आफू पनि विराटनगर आउने जाने गरेको उनले दाबी गरेकी छन्। त्यहाँ पनि प्रहरीलाई भन्न लगाइभित्र छिर्न नदिएको उनले जनाएकी छन्। त्यसपछि आफूलाई जागिर र पार्टीको जिम्मेवारीबाट पनि निकालिएको बालिकाको दाबी छ।
आफूमाथि अन्याय भएको भन्दै पार्टीको दुवै अध्यक्षलाई भेट्न खोज्दा दुवै अध्यक्षले भेट नदिएको पनि उनले जनाएकी छन्। त्यसपछि आफूलाई झुटा आरोपमा प्रहरीलाई पक्राउ गरी कमलपोखरीमा थुनामा राखिएको र थुनामा जबर्जस्ती ‘शेरधन राई पति हो भन्दिनँ भन’ भनी दबाब दिएकोसमेत उनले खोलेकी छन्।
राईले पार्र्टीको सदस्यतासमेत निलम्बन गराइ आफूमाथि घरेलु हिंसा, शारीरिक तथा मानसिक यातनासमेत दिएको हुँदा बाध्य भई अदालतमा मुद्दा दायर गर्नुपरेको उनले जनाएकी छन्।
बालिकाले दर्ता गरेको मुद्दाको पेशी आउँदो चैत १७ गतेका लागि तोकिएको छ। नेपाल न्युजबाट
Discussion about this post