इटहरी : भोजपुरमा पनि एकजनामा कोरोना संक्रमणको पुष्टि भएपछि भोजपुरको हतुवागढी क्षेत्रमा सिल गरिएको छ । ३० फागुनमा साउदी अरबबाट नेपाल आएका २६ बर्षीय युवकमा विहीबार कोरोना संक्रमणको पुष्टि भएपछि यो क्षेत्रमा सिल गरिएको हो ।
यसैबीच ती युवक साउदी अरबबाट आएपछि सुनसरी, उदयपुर घुमेर बल्ल आफ्नो घर भोजपुर गएको खुलेको छ । प्रहरी स्रोतका अनुसार उनी आफ्नी श्रीमतीसँग सुनसरीको इटहरी, धरान घुमेको पनि खुलेको छ । उनी ३० फागुनमा साउदी अरबबाट काठमाडौँ आएपछि रात्री बस चढेर सुनसरी आएका थिए । उनी सुनसरीको झुम्कामा उत्रिए, झुम्काको स्टेनबाट चतरा पुगे । चतराबाट श्रीमतीसँग भेट भयो । श्रीमतीसँगै उनी धरान टेम्पो चढेर गए । त्यसपछि उनी केही दिन धरान घुमे । धरानमा मात्रै नभई उनी इटहरी, चतरा आउँने–जाने क्रम दोहोर्याइरहेको पनि खुलेको छ । ८ दिनसम्म सुनसरीका यी स्थानमा घुमफिर गरेपछि ती युवक ९ चैत्रमा उदयपुरको मैनामैनी गए । उनी उदयपुरमा ससुराली गएको खुलेको छ । उनी दुइदिन ससुराली बसेपछि भोजपुर गएका हुन् । उनी फाल्गुन ३० मा बिहान ९ बजेको उडानमा हिमालयन एयरलाइन्सको विमानबाट आएका थिए । प्रदेश १ मा २८ जना कोरोना संक्रमित उदयपुरमा मात्रै फेला परेको र ती युवकमा पनि कोरोना पुष्टि भएपति युवकलाई उदयपुरमा या साउदी अरबमै कोरोना लागेको भन्ने पुष्टि हुँन बाँकी रहेको छ ।
स्थानीयका अनुसार उनी भोजपुर आएको भोलिपल्टै स्थानीय प्रशासनलाई जानकारी भएको भएपनि प्रशासनले बेवास्ता गरेको थियो । ‘हामी सबैलाई र प्रशासनलाई पनि थाहा थियो उनी आएको,’ भोजपुर हतुवागढीका एक युवकले टाकुरान्यूजसँग भने, ‘त्यो समयमा उनको स्वाब परीक्षण समेत भएन, यहाँ हुँदा भलिबल खेल्ने र गाउँ डुल्ने क्रम रह्यो, त्यो त दैनिकी नै थियो ।’ ती मानिसका अनुसार युवक भलिबल खेलाडी समेत रहेकाले गाउँमा भलिबल खेल्ने र सामान्य रुपमै दैनिकी चलिरहेको थियो । यसअघि नै उनको आरडीटि रिपोर्टमा पोजेटिभ आएपछि श्रीमती, आमा, भाईको परीक्षण गर्दा नेगेटिभ रिपोर्ट आएको प्रहरी स्रोतले जनाएको छ ।
उनी नेपाल आएको ३८ दिनपछी आरडीटी परीक्षण गर्दा पोजेटिभ रिपोर्ट आएको थियो । उनको आरडीटीमा पोजेटिभ रिपोर्ट आएपछि पुनः स्वाब परीक्षणका लागि त्यसको दुई दिनपछि धरानस्थित वीपी कोईराला स्वास्थ्य विज्ञान प्रतिष्ठानमा ल्याईएको थियो । ती युवकलाई अहिले हतुवागढीको एक हेल्थपोष्टको आइसोलेसनमा राखेर उपचार गरिदैँ आएको छ । उनको स्वास्थ्य अवस्था सामान्य रहेपनि स्थानीयबासीमा भने त्रास बढेको छ ।
Discussion about this post