प्रदेश १ सरकारले निर्माण गरेको मोरङ सुन्दरहरैँचा नगरपालिकास्थित गोठगाउँमा रहेको पूर्वाञ्चल विश्वविद्यालयमा औपचारिक रुपमा क्वारेनटाइन सञ्चालनमा आएको छ ।
यहाँ रहेको विश्वविद्यालयमा मंगलबारबाट औपचारिक रुपमा क्वारेन्टाइन सञ्चालनमा आएको हो ।
नेपाली सेनाको पूर्वी पृतना मुख्यालय अन्र्तगतको सूर्य दल गणले नेतृत्व लिएको सेनानी शुष्मन कटवालले बताए । उनका अनुसार यहाँ १ सय ३५ बेड क्षमताको क्वारेन्टाइन निर्माण भएको हो ।
चारैतिरबाट तारले बारिएको र २४ घण्टा नै नेपाली सेना सुरक्षामा रहेको उनले बताए । ‘हाइस्पिड इन्टरनेट समेत राखिएको छ,’ उनले टाकुरान्यूजसँगको कुराकानीमा भने, ‘यसअघि टाँडीमा निर्माण गरिएको क्वारेन्टाइन हावाहुरी र पानीका कारण समस्या रहेको थियो ।’ यसअघि टाँडीको क्वारेन्टाइनमा भने हावाहुरी र पानीका कारण समस्या हुँदै आएको बताउँदै उनले अहिलेसम्म पूर्वाञ्चल विश्वविद्यालयमा कोही पनि व्यक्ति क्वारेन्टाइनमा नरहेको बताए ।
उनले भित्री सुरक्षामा १४ वटा सीसी क्यामेराले मोनिटर गरिने व्यवस्था मिलाइएको जानकारी दिए । क्वारेन्टाइनमा रहेका व्यक्तिलाई दैनिक आवश्यक पर्ने सामानहरु ब्रस, पेष्ट, साबुन, झुललगायत सामग्री दिइने छ । क्वारेन्टाइनमा बस्न आउनेलाई खाजा र खाना गरी दैनिक ४ पटक दिइने र हप्तामा ४ पटक फलफूल खाने व्यवस्था मिलाइएको छ ।
यसैबीच मंगलबार सम्म प्रदेश १ का ३ सय २२ स्थानमा ७४३ जना क्वारेन्टाइनमा रहेका छन् । जसमध्ये १३७ महिला रहेका छन् भने बाँकी पुरुष रहेको प्रदेश १ को सामाजिक विकास मन्त्रालयले जनाएको छ । प्रदेश १ भरीका विभिन्न क्वारेन्टाइनमा ५ हजार ८ सय ५२ बेड संख्या रहेको छ ।
Discussion about this post