धरान : धरान उपमहानगरपालिकाले कोरोना रोकथाम, नियन्त्रण र उपचार कोषमा पदाधिकारी, डाक्टर र कर्मचारीहरुको तलब जम्मा गर्न आग्रह गरेको छ । धरान उपमहानगरपालिकाका मेयर तिलक राईले वीपी कोइराला स्वास्थ्य विज्ञान प्रतिष्ठान धरानलाई पठाएको पत्र बाहिरिएपछि अहिले तीब्र आलोचना भएको छ ।
सोमबार उक्त पत्र सामाजिक सञ्जालमा बाहिरिएपछि मेयर राईको तीब्र आलोचना भएको हो । सामाजिक सञ्जालमा विभिन्न व्यक्तिहरुले यो समयमा डाक्टर तथा अस्पतलाललाई प्रोत्साहन गर्नुपर्ने समयमा उल्टै अस्पताललाई चन्दा मागेको पत्र बाहिरिएपछि तीब्र आलोचना भएको हो ।
मेयर तिलक राईले हस्ताक्षर गरेको उक्त पत्र चैत २३ गते प्रतिष्ठानका उपकुलपतिलाई लेखेको पत्रमा पदाधिकारीको १५ दिनको पारिश्रमिक जम्मा गर्न भनिएको छ भने डाक्टर लगायत अन्य कर्मचारीहरुको १० दिनको पारिश्रमिक राहत कोषमा उपलब्ध गराउन माग गरिएको छ । पत्रको बोधार्थ फ्याकल्टी अफ मेडिसिन, कलेज अफ डेन्टल सर्जरी, कलेज अफ नर्सिङ, स्कुल अफ पब्लिक हेल्थ एण्ड कम्युनिटी र कर्मचारी कल्याण मञ्चलाई दिइएको छ । बिपद्को समयमा ज्यानको जोखिम राखेर खटिएका स्वास्थ्यकर्मीलाई प्रोत्साहन गर्नुको साटो चन्दा माग्नु सरासर गलत रहेको सामाजिक सञ्जाल प्रयोगकर्ताहरुले बताएका छन् ।
कांग्रेसबाट उपनिर्वाचनमा मेयर पदमा बिजयी भएका मेयर राईले गलत गरेको कांग्रेसकै नेताहरुको ठम्याई रहेको छ । धरान कांग्रेसका युवा नेता विकास आचार्यले फेसबुकमा एक स्टाटस लेख्दै भनेका छन्, ‘फ्रन्टलाईनमा बसेर काम गर्ने स्वास्थ्यकर्मीहरुलाई सुविधा र प्रोत्साहन भत्ता थपिदिनुपर्ने, बीमा गरिदिनुपर्ने हो । अझ प्रदेश नम्बर १ कै कोरोना संक्रमण परीक्षण गर्ने अस्पताल जस्तो जोखिमपूर्ण स्थानमा काम गर्नेलाई हौसला दिनुको सट्टा पदीय हैसियत तोकेर यतिउती दिनको तलब कट्टा गरेर हामीलाई दे भन्नु नितान्त गलत हो, कसैले स्वेच्छाले दिन्छ भने बेग्लै हो । मेयरलाई यो गलत सल्लाह कसले दिएछ ?’ उता, प्रतिष्ठानका कार्यवाहक उपकुलपति प्रा.डा.गुरु खनालले सहयोग माग्न पाउँने अधिकार रहेको बताए । ‘सहयोगको कुरा आउँनु स्वभाविक हो, तर दिने नदिने हाम्रो अधिकारभित्रको कुरा हो,’ उनले भने ।
उता, मेयर राईले भने आँफूहरुले चन्दा नमागेको स्पष्टीकरण दिए । ‘अहिले विश्व महामारीको अवस्थामा रहेका बेला विपन्न परिवारलाई हामीले राहत वितरण गरिराखेका छौँ,’ राईले टेलिफोन सम्पर्कमा टाकुरासँग भने, ‘यसमा सबैजना सहभागी होस्, हामी सहयोग गर्थे भन्ने हुँन सक्छ, त्यसैले आग्रह गरिएको हो ।’ उनले अनिवार्य नभएर आग्रह मात्र गरिएको बताउँदै आँफूहरुको असल नियत रहेको बताए । हामी यो बिषयमा भोलि पत्रकार सम्मेलन पनि गर्नेछौँ, उनले भने, ‘डाक्टरहरु ज्यानको बाजी लगाएर खट्नु भएको छ, त्यो हामीले बुझेका छौँ र उहाँहरुको साथमा पनि छौँ, सहयोग पनि गरेका छौँ, तर कसैको सहयोग गर्ने इच्छा छ भने सहयोग गर्न सक्नुहुन्छ भन्ने कुरा हो ।’
उक्त पत्रले कसैलाई असर परेमा आँफू पुर्नविचार गर्न तयार रहेको मेयर राईले बताए ।
Discussion about this post