इटहरी ३ मा राहतमा विभेद भएको भन्दै भ्रामक प्रचार, वडाध्यक्ष भन्छन्, ‘सुनको औँठी लगाउँने पनि राहत माग्न आउँछन्’

इटहरी : इटहरी वडा नम्बर ३ को नमूना टोलका बासिन्दाहरुले यहाँका वडाध्यक्षले राहतमा विभेद गरेको आरोप लगाएपछि वडाध्यक्ष बालकृष्ण बिष्टले राजनीतिक पूर्वाग्रहका आधारमा झुटो प्रचार गरिएको बताएका छन् ।
इटहरीका केही मिडियाहरुले राजनीतिक पूर्वाग्रहका आधारमा झुटो प्रचारमा केन्द्रीत भएको उनले बताएका हुन् । हातमा सुनको औँठी र घाँटीमा सिक्री लगाउँनेहरु लाइनमा लागेको उनको भनाई छ । ‘इटहरीमा त कसैको पार्टीको निर्देशनमा आएर समाचार लेख्ने चलन रहेछ,’ उनले टाकुरान्यूजसँग भने, ‘हिजो इटहरीका केही मिडियामा भ्रामक र कपोकल्पित समाचार आएपछि हामीले आज नै बैठक बसेर कथित समाचारको खेद व्यक्त गर्दै केही निर्णयहरु गरेका छौँ ।’
हालसम्म पहिलो चरणमा वडा नं. ३ का ९ सय १९ घरपरिवारलाई राहत वितरण गरेको उनले बताए । ‘सुनका औँठी लाउँनेहरु अरुलाई रक्सी खुवाएर उफ्राइरहेका रहेछन्,’ उनले भने, ‘सुनियोजित हिसाबमा बद्नाम गर्न खोजियो आज आकस्मिक रुपमा बैठक बस्दा उनीहरुले नै गल्ती भएको स्वीकार गरेका छन् ।’ उनले एक पार्टीका स्थानीय अध्यक्षले नै समाचार सेयर गरेको र भ्रामक प्रचारको पछि लागेको भन्दै जो पीडित छ उसले प्रत्यक्ष भेटेमा आँफूले सहयोग गर्ने बताए । उनले भने, ‘निर्देशनको आधारमा कराउँनेहरु छन्, कोही पीडित भएमा वडाले जस्तोसुकै अवस्थामा पनि सहयोग गर्छ ।’ उनले पत्रकारहरु नै अन्य कोही व्यक्तिबाट सञ्चालित भएर आउँने गरेको बताउँदै भने, ‘तपाईँहरु स्थलगत रुपमा अध्ययन गर्नुहोस्, हामी जनतालाई मारेर आँफू बच्ने पक्षमा छैनौँ । पत्रकार हो भने सहि रुपमा आउँनुहोस्, कोहीबाट सञ्चालित भएर हैन ।’
वडामा खान बाटै बञ्चित कोही पनि नभएको दाबी गर्दै वडाध्यक्ष बिष्टले आँफूले पीडितको घर–घरमा नै गएर अवलोकन गरेकाले दोस्रो चरणको राहतमा उनीहरुलाई घरमै गएर वितरण गर्ने बताए । राहतको नाममा कसैले पनि राजनीतिकरण र विभेद नगर्न अपिल गर्दै उनले भने, ‘हामी मजदूरकै पक्षमा छौँ, मजदूर जनतालाई भोकै राख्ने हाम्रो उदेश्य छैन, बरु हामी भोकै बस्छौँ, तर जनता भोकै राख्दैनौँ, तर भ्रामक प्रचार गर्न बन्द गरियोस् ।’ सामाजिक सञ्जालमा आलोचनात्मक रुपमा समाचार राखिएकाले बिषम् परिस्थितिमा काम गर्न कठीन भएको उनको भनाई थियो ।