२०७४ सालमा प्रदेशको निर्वाचनताका बेला सर्वध्वज साँवाले इटहरीमा आकाशे पुलसहितको डेटिङ स्पोर्ट बनाउँने कुराले राम्रै चर्चा पायो ।
त्यति मात्र हैन, साँवाले चुनावताका समयमा आँफूले इटहरीमा दुई सय बेड क्षमताको सुविधासम्पन्न अस्पताल बनाउँन आफ्नो उमेद्धारी रहेको कुराले चर्चा पायो ।
सोही कारणले गर्दा पनि उनी प्रदेशसभामा निर्वाचित भए । साँवा त एक प्रतिनिधि पात्र मात्र हुन् । यहाँबाट चुनावमा प्रतिष्पर्धा गरेका सबैजसो राजनीतिक दलहरुले इटहरीमा सुविधासम्पन्न अस्पताल बनाउँने मुद्धा अगाडि सारेका थिए ।
तर, अहिले न त इटहरीमा सुविधा सम्पन्न अस्पताल निर्माण भएको छ, न त यहाँको चौतर्फी विकास नै भएको छ ।
यसैबीच इटहरीका सर्वसाधारण नागिरकदेखि सामाजिक अभियन्ताहरुले अहिले इटहरीमा सुविधासम्पन्न अस्पताल बनाउँनका लागि माग गरिरहेका छन् । सामाजिक सञ्जालमा मात्र नभई अहिले यहाँका नागरिकहरु स्थानीय सरकार र प्रदेश सरकारलाई घचघचाइरहेका छन् ।
अहिले कोभिड–१९ का कारण विश्व महामारीको अवस्थामा रहेकाले इटहरीमा एउटा सुविधासम्पन्न अस्पताल निर्माण नहुँनु अस्वभाविक रहेको अभियन्ताहरुको तर्क छ ।
अहिले एकथरीले इटहरीमा अस्पताल माग गरिरहेका छन् भने एकथरीले आकाशे पुलको माग गरिरहेका छन् । तर, सीमित मानिसहरुले यी दुवैको आवश्यकता रहेको बताउँछन् । संगीत साधना प्रतिष्ठान इटहरीका महासचिव राजु केसी भन्छन्, ‘नाम मात्रको दुई सय बेडको अस्पताल बनाएर काम छैन, म्यानपावर पनि हेर्नुपर्ने हुन्छ ।’
केसीले आँफूले पनि अस्पताल चाहिने बताउँदै आएको भएपनि इटहरीलाई ट्रमा सेन्टर बनाउँनुपर्नेमा जोड दिए ।
उनले भने, ‘इटहरीमा ट्रमा सेन्टर बनाउँनुपर्छ, आकस्मिक रुपमा हामी जानुपर्यो भने कि धरान कि विराटनगर पुग्नुपर्ने हुन्छ ।’ उनले इटहरीमा जेनेरल अस्पताल नभई कुनै एक रोगलाई विशेष प्राथमिकतामा राखेर उपचार गरिएमा सहज हुने तर्क गरे ।
‘पूर्वाधार मात्र बनाएर काम नै छैन, राज्यले म्यानपावर पनि धान्न सक्नुपर्छ र स्पेसल एउटा कुनै रोगका लागि र आकस्मिक सेवा सञ्चालन गर्न आवश्यक छ,’ केसीले टाकुरान्यूजसँग भने, ‘सबैभन्दा ठूलो कुरा पूर्वाधार मात्र हैन, म्यानपावर पनि हो ।’
स्थानीय युवा अभियन्ता सम्राट थापाले भने चियागफमा विश्व परिवर्तन गर्नेहरु नै इटहरीमा अस्पताल बनाउँनपर्छ भन्दा नसुने जस्तो गरेको गुनासो गर्छन् ।
उनी भन्छन्, ‘हातको औँलामा गन्ने नै हो भने नेपालको सबैभन्दा बढी समाजसेवी बस्ने सहर भन्छन्, तर यहि इटहरीमा गरीवका लागि जीवनको मूल्य छैन ।’
थापाले इटहरी उपमहानगरपालिकाका विज्ञहरुसँग छलफल गरी तत्काल यसको कामलाई अगाडि बढाउँनुपर्नेमा जोड दिए ।
‘हिजोको दिनमा प्रदेशको राजधानी माग्दा इटहरीमा यस्ता विशेषता छन् भन्दै फूलमाला सहित हिड्नेहरु कहाँ छन्,’ उनले भने, ‘आज गरीबका लागि अस्पताल माग्दा किन सबैजना मौन ?’
Discussion about this post