कोरोनाको महामारीका कारण नियमित रुपमा प्रयोग गर्दै आएको औषधी नपाएपछि धनकुटा हिलेका पुष्पलाल तामाङले स्वास्थ्यमन्त्रीलाई एक पत्र लेखेका छन् ।
जन्मजात हिमोफिलियाका बिरामी रहेका उनलाई अहिले प्रोटिन नहुँदा आन्तरिक रुपमा रत्तश्राव हुने गरेको पत्रमा उल्लेख गरेका छन् ।
२६ वर्षदेखि यो औषधि प्रयोग गर्दै आएको र अहिले कोरोनाका कारण औषधी नपाएर आफू छट्पटाइरहेको उनले बताएका छन् ।
लकडाउनका कारण प्रदेश १ मा औषधी नपाएको र काठमाडौंमा रहेको हेमोफिलिया सोसाइटीमा बुझ्दा औषधि नभएको जानकारी पाएपछि जीवन र मरणको दोसाँधमा रहेको भन्दै तामाङले स्वास्थ्य मन्त्री भानुभक्त ढकाललाई पत्र लेख्दै भनेका छन् – ‘म अहिले ओछ्यानमा चिच्याउँदै, रुँदै कराउँदै भगवानसँग बिलौना गर्दै, हजुर र देशलाई समेत गाली गर्दै, सराप्दै बाँच्न विवश छु । पिसाबबाट रगत बगिनै रहेको छ । औषधी लगाउन पाएको छैन । अव त मलाई बाँच्ने आशा नै मरिसकेको छ । म एकदम निराश छु ।’
उनले आफ्नो जीवन गए पनि अन्य साथीहरुको आत्माले सराप्ने पत्रमा उल्लेख गरेका छन् ।
Discussion about this post