अस्पतालमा घुमाउँदा–घुमाउँदै सुनसरीका विरामीको एम्बुलेन्समै मृत्यु

अस्पतालले भर्ना गर्न नमान्दा सुनसरीका एकजना युवाको मृत्यु भएको छ ।
सुनसरीका २७ बर्षीय रवीन्द्र यादवलाई मोरङका विभिन्न अस्पतालहरुले भर्ना गर्न नमानेपछि उनको मृत्यु भएको हो ।

सुनसरीको देवानगञ्ज–१ का यादवलाई गत आइतबार विराटनगरको कोसी अस्पतामा भर्ना गरिएको थियो ।
उनलाई भेन्टिलेटर आवश्यक पर्ने भएपछि बुधबार बेलुका अन्यत्र रेफर गरिएको थियो ।

मृर्गौला र कलेजोमा समस्या देखिएपछि भेन्टिलेटर चाहिने भएकोले अन्यत्र रेफर गरेको कोसी अस्पतालले जनाएको छ ।
कोसीबाट रेफर भएपछि भेन्टिलेटर भएको अस्पताल खोज्दै बुधबार साँझदेखि बिहीबार अपरान्हसम्म आफन्तले विराटनगरका अस्पतालमा गुहार गरेपनि उनलाई ज्वरो आएको भन्दै विराटनगरका अस्पतालले भर्ना गर्न नमान्दा उनको मृत्यु भएको परिवारले जनाएका छन् ।
बुधबार राती ११ बजेसम्म नोबेल अस्पतालको इमर्जेन्सी अगाडि राखिएपनि विरामीलाई भर्ना गर्न नमानेको रवीन्द्रका बुवा जोगीलाले यादवले बताए ।

विहीबार अपरान्ह सुनसरीको धरानस्थित बीपी कोइराला स्वास्थ्य विज्ञान प्रतिष्ठानमा ल्याईएको भएपनि उनको एम्बुलेन्समा ल्याउँने क्रममै निधन भएको डाक्टरहरुले घोषणा गरेका थिए ।

उनको साँझ ७ बजे मृत्यु भएको डाक्टरहरुले घोषणा गरेका थिए ।
‘एक सय भन्दा माथि ज्वरो आएको भन्दै भर्ना गर्न मानेनन,’ जोगीलाले विक्षिप्त हुँदै भने, ‘कोसी अस्पतालका नर्सहरुले यहाँ राखे विरामीको मृत्यु हुन्छ भने हामीले गोल्डेन अस्पताल पनि लग्यौँ, त्यहाँ पनि केही सीप लागेन ।’

उनले विराटनगरका सबैजसो अस्पतालमा उपचारका लागि लगिएको भएपनि भर्ना गर्न नमान्दा रवीन्द्रको मृत्यु भएको हो ।
यादवका अनुसार विराटनगरका कुनै पनि अस्पतालले भर्ना लिन नमानेपछि बीपी प्रतिष्ठान धरानमा ल्याउँदा रवीन्द्रको एम्बुलेन्समै ज्यान गएको थियो ।

विहीबार नै नोबेल अस्पतालले उदयपुरबाट ल्याईएकी गर्भवती महिलालाई अप्रेसन थियटरबाट निकालेको समाचार बाहिरिएको थियो ।
कोरोना संक्रमण फैलिएको जिल्लाबाट बिरामी ल्याईएको र कोरोना लागेको हुनसक्ने भन्दै नोबेलले अप्रेसन थियटरबाट गर्भवती महिलालाई निकालेको समाचार बाहिरिएको थियो ।
अहिले विराटनगरका अधिकांश अस्पतालहरुले विरामी लिन नमान्दा बिरामीहरुको बिचल्ली हुने गरेको छ ।

यो पनि – कोरोना फैलिएको जिल्लाबाट आएको भन्दै उदयपुरकी गर्भवती महिलालाई नोबेलले अप्रेशन थियटरबाटै निकाल्यो‘