इटहरी उपमहानगरपालिकाका मेयर द्धारिकलाल चौधरीले केही साताअगाडि लकडाउन ६ महिनासम्म भएपनि इटहरीका जनतालाई भोकै मर्न नदिने बताएसँगै उनको हाइहाई भयो ।
तर, मेयर चौधरीले सर्वसाधारण मानिसहरुको वास्तविक पीडालाई भने सम्बोधन गर्न सकेनन् ।
अहिले पनि इटहरी क्षेत्रका सर्वसाधारण मानिसहरु भोकभोकै रहेको र पहिलो चरणको पनि राहत नपाएको गुनासो गरिरहेका छन् ।
इटहरी उपमहानगरपालिका वडा नं. २ का स्थानीय सर्वसाधारणले राहत नपाएको र भोकभोकै रहेको गुनासो गरेका हुन् ।
तर, यस बिषयमा न त वडा कार्यालयको ध्यान गएको छ न त अन्य सरोकारवाला निकायको नै । बरु अन्य कोही मानिसले राहत दिएपनि फोन गरेर राहत दिने मानिसलाई नै दबाब दिने गरेको पाइन्छ ।
वडाले भाडामा बस्ने मानिसहरुले राहत नपाउँने भनेको रहेछ, एक पीडित महिलाले टाकुरासँग भनिन्, मैले अहिलेसम्म राहत नै पाएको छैन, कारण हो भाडामा बसेकोले । उनले आँफू सामान्य मजदूरी गरेर जीविकोपार्जन गर्दै आएको बताईन् ।
इटहरी २ बरगाछीमा कोठाभाडामा बस्दै आएकी अर्की एक महिलाले भोटर्सको आधारमा राहत वितरण गरेको बताईन् ।
उनले भनिन्, भाडामा बस्नेले भोट दिदैँनन् भन्ने आधारमा राहत वितरण गरिएको भन्ने सुन्नमा आएको छ, अब भोलि विहान खाने चामल बाहेक अरु केही छैन । उनले आँफू होटलमा काम गर्दै आएको र अहिले होटल बन्द भएकाले समस्या भएको गुनासो गरिन् ।
उता, इटहरी वडा नं. २ का वडाध्यक्ष हर्क मगरसँग सम्पर्क गर्दा उक्त वडामा कोही पनि पीडित नरहेको बताए ।
हामीलाई थाहा छैन, मलाई नै जानकारी छैन तपाईलाईँ कसरी थाहा भयो ? उनले फोन सम्पर्कमा प्रतिप्रश्न गर्दै भने, मलाई भन्नुपर्ने, मलाई जानकारी गराउँनुपर्ने कसरी तपाईँहरुमाझ आयो ? उनले राहत पाउँनबाट कोही पनि जनता बञ्चित नरहेको दाबी गरे ।
उनले भने, अहिलेसम्म हामीले १६ सय घरपरिवारलाई राहत वितरण गरिसकेका छौँ । मगरले टोल विकासको समन्वयमा राहत वितरण गरिएको बताए ।
यसअघि पनि इटहरी २ मा राहतमा विभेद भएको गुनासो आएको थियो ।
Discussion about this post