सुनसरीको कोशीटप्पु वन्यजन्तु आरक्षमा पछिल्लो समय संरक्षण अधिकारीबाटै वन फडानीदेखि आरक्षमा वन्यजन्तुको सिकार गर्ने व्यक्तिले प्रश्रय पाउने गरेको गुनासो आएको छ ।
जैविक विविधताले भरिपूर्ण, मनोरम दृश्य तथा प्राकृतिक सौन्दर्यका कारण पूर्वकै प्रमुख पर्यटकीय स्थल बन्ने सम्भावना भएको कोशी टप्पुमा रामदेव चौधरी प्रमुख संरक्षण अधिकृतका रूपमा आएपछि वन फडानीदेखि वन्यजन्तुको चोरीसिकारी बढेको स्थानीयको गुनासो छ।
सुनसरी, सप्तरी र उदयपुर जिल्लाको १७५ वर्गकिलोमिटर क्षेत्रफलमा फैलिएको कोशीटप्पु वन्यजन्तु आरक्षमा लकडाउनको समयमा चित्तल, बदेल जस्ता वन्यजन्तुको चोरीसिकारी बढेको छ । लकडाउनको अवधिमा अहिलेसम्म ७ जना चित्तल सिकारी पक्राउ परेका छन् ।
सिकारीलाई मोटो रकम लिएर छाडेको आरोप
गत चैत्र २९ गते चित्तलको सिकार गरेको आरोपमा नेपाल आर्मी र कोशीटप्पु वन्यजन्तु आरक्षका कर्मचारी नेतृत्वको संयुक्त टोलीले दुईजनालाई रंगेहात पक्राउ गरेको थियो ।
तर, ती सिकारीहरुलाई आरक्षका वार्डेन रामदेव चौधरीले मोटो रकम लिएर छाडेको स्थानीयको गुनासो आएको छ । उनीहरुलाई कानुनी कारबाही नै नगरी मोटो रकम लिएर छाडिएको स्थानीयले बताएका छन् ।
बराहक्षेत्र नगरपालिका वडा नम्बर ९ श्रीलंका टापुको नारायणपुर भन्ने स्थानबाट सिकार गर्दै गरेको स्रचना पाएपछि ३० बर्षीय सन्तोष कविरथ र ४० वर्षीय डोमा कविरथ पक्राउ परेका थिए ।
नेपाली सेनाले अन्दाजी ४ बर्षको चित्तलको सिकार गरी घरमा लुकाउंदै गरेको अवस्थामा उनीहरूलाई नियन्त्रणमा लिई कोशी टप्पु बन्यजन्तु आरक्ष कार्यालय पश्चिम कुशाहामा आवश्यक कानुनी कारबाहीको लागि बुझाएको थियो ।
तर, कोशी टप्पु वन्यजन्तु आरक्षका वार्डेन रामदेव चौधरीको निर्देशनमा आरक्षका रेन्जर जयराम न्यौपाने सहितले अनुसन्धान समेत नगरी पक्राउ परेकाहरुका आफन्तबाट मोटो रकम लिएर एकहप्ता भित्रै उनीहरूलाई छाडेको गुनासो आएको छ ।
राष्ट्रिय निकुञ्ज तथा वन्यजन्तु संरक्षण ऐन, २०२९ बमोजिम वन्यजन्तुको चोरी सिकारी गर्ने व्यक्तिलाई थुनामा राख्ने अनुमति मागेमा मुद्दा हेर्ने अधिकारीले सम्बन्धित कागजातहरु हेरी तहकिकात सन्तोषजनक रुपमा भए वा नभएको विचार गरी सन्तोषजनक रुपमा तहकिकात भैरहेको देखिएमा एकैपटक वा पटक पटक गरी बढीमा पैँतालीस दिनसम्म थुनामा राख्ने अनुमति दिन सक्ने व्यवस्था छ ।
चित्तलको सिकार गर्ने व्यक्तिलाई ६ महिनादेखि १ वर्षसम्म कैद र २० हजारदेखि ५० हजारसम्म जरिवानाको प्रावधान रहेको कोशी टप्पु वन्यजन्तु आरक्षका सूचना अधिकारी तथा सहायक संरक्षण अधिकृत सन्तोषकुमार भगत बताउँछन् ।
थुनुवा बस्ने सिकारी कसरी छुटे ?
चैत्र २९ गते कोशी टप्पु वन्यजन्तु आरक्षको कार्यालय पश्चिम कुसाहाले पत्र संख्या २०७६।०७७ चलानी नम्बर ७८६ मा डोमा कविरथ र सन्तोष कविरथलाई प्रतिवादी बनाएर अवैध रूपमा वन्यजन्तु चित्तल मारेको मुद्दामा कसुर अनुसन्धानको लागि हिरासतमा राख्नुपर्ने भएको भन्दै थुनुवा पुर्जी दिइएको थियो ।
तर, उनीहरूको मुद्दा अनुसन्धान गर्ने अधिकारी रेन्जर न्यौपानेले मुद्दा अधिकारी प्रमुख संरक्षण अधिकृत वार्डेन रामदेव चौधरीको निर्देशनमा एकहप्तामा पनि थुनामा न राखी मोटो रकमको चलखेलमा आरोपित छाडेको श्रोतको भनाइ छ ।
कार्यालयका सूचना अधिकारी आफैं मुद्दा चलाइएका व्यक्ति कसरी र कुन आधार छाडियो भन्ने बारेमा बेखबर हुनु, आरक्षका रेन्जरले ५० दिनभन्दा बढी पुगेपनि अझै छानबिन जारी रहेको भन्नुले वन्यजन्तुको सिकार गर्ने व्यक्तिलाई आरक्षका वार्डेन चौधरी, रेन्जर न्यौपाने सहितकाले मोटो रकम लिएर छाडेको आरोपमा बल पुगेको देखिन्छ ।
कोशी टप्पु वन्यजन्तु आरक्ष क्षेत्रका दुर्लभ प्रजातीका वन तस्करहरुसँग मिलेर फडानी गरेको आरोपसमेत आरक्ष वार्डेन चौधरीमाथि लाग्ने गरेको छ ।
यता यसबारेमा प्रतिक्रिया लिन सम्पर्क गरेपनि कोशी टप्पु वन्यजन्तु आरक्षका वार्डेन रामदेव चौधरीले अनुसन्धान अधिकारीसँग सोध्नुस् भन्दै पन्छिन खोजे ।
Discussion about this post