इटहरीमा चोरीका घटनामा बृद्धि, प्रहरीले बेवास्ता गरेको आरोप

इटहरी

इटहरीमा चोरीका घटनामा बृद्धि भएको छ । विशेषगरी इटहरी उपमहानगरपालिका वडा नं. १ र वडा नं. २ मा चोरीका घटनामा बृद्धि भएपनि प्रहरीले बेवास्ता गरेको पीडितहरुको गुनासो रहेको छ ।
इटहरी २ बरगाछीका कुल बहादुर कार्कीले आफूँले सञ्चालन गरेको उपकार मेडिकलबाट करीब १८ हजार रुपैँया चोरी भएको बताए । ‘मेरो मेडिकलबाट उक्त रकम चोरी भएपनि प्रहरीलाई जानकारी गराएको थिएँ,’ उनले गुनासो गरे, ‘केही दिन अगाडि पनि मोबाइल चोरी हुँदा हामीले रंगेहात मानिस पक्राउ गरेको भएपनि प्रहरीले त्यतिकै छोडेको छ ।’ इटहरी १ का मनिष गिरीको सामसुङ मोबाइल चोर्दै गर्दा दुर्गेश राई र साजन तामाङलाई स्थानीयले रंगेहात पक्राउ गरी प्रहरीकहाँ जिम्मा लगाएको भएपनि तरहरा प्रहरी चौकीले आरोपीलाई त्यतिकै छाडेको उनको भनाई छ ।
स्थानीय समिता पौडेलको घरको २ वटा ग्याँस सिलिन्डर, २ वटा पानीको मटर र साईकल चोरी भएको भएपनि प्रहरीको बेवास्ताका कारण दोषी पहिचान नभएको गुनासो गरिन् । ‘समाज बिथोल्ने काम भईरहेको छ तर प्रहरीको लापरबाही र फितलो अनुसन्धानका कारण हामीलाई दिनमा हिड्न र रातमा सुत्न पनि कठीन हुन्छ,’ उनले टाकुरासँग भनिन्, ‘बरगाछी एरियामा दैनिकजसो चोरी हुने गरेको छ, हराएको सामानको खोजी चासो भएन ।’
केही महिनायता, यी माथिका दुई पात्र नभई यहाँका दर्जनौँ पसल तथा घरहरुमा चोरी भएपनि प्रहरीले बेवास्ता गरेको पीडितको आरोप छ । केही हप्ता अगाडि मात्रै दाजुभाई कोल्ड सेन्टरबाट नगद चोरी भयो । त्यस्तै, २ हप्ता अगाडि मात्रै यहाँ रहेको अरुण किराना तोडफोड भयो । त्यस्तै, मनिष फर्निचरको सामान चोरी भएको थियो भने त्यस्तै, शुष्मा ब्यूटी पार्लरको सटर तोडफोड भएको थियो । यी माथिका सबै घटनाबारे तरहरा प्रहरी चौकी र ईलाका प्रहरी कार्यालय इटहरीमा जानकारी गराएको भएपनि प्रहरी मुकदर्शक बनेको स्थानीय बुद्धिमान बिकको भनाई रहेको छ ।
बिकले भने, ‘हामीलाई शान्ति सुरक्षा चाहियो, यहाँका व्यापारीहरु पाँच मिनेट जानका लागि पनि डराउँनु पर्ने अवस्था रहेको छ ।’ उनका अनुसार यहाँ पसल गरेर बस्ने मानिसहरु केही छिनपनि पसल छाडेर हिड्न डराउनुपर्ने अवस्था रहेको छ, तर यस बिषयमा प्रहरी मुकदर्शक बनेको उनको आरोप छ । स्थानीय पर्शुराम धिमालले भने चोरीको बिषयमा प्रहरीलाई अाँँफूहरुले सामूहिक रुपमा लिखित र मौखिक जानकारी गराएको भएपनि प्रहरीले आफ्नो गुनासो नसुन्ने गरेको तर्क गरे । ‘हामीले पटक–पटक प्रहरीलाई जानकारी गराईसकेका छौँ, तर प्रहरीले हाम्रो कुरा सुनेकै छैन,’ उनले गुनासो गर्दै भने, ‘तरहरा प्रहरी चौकीले हामीले चोरलाई स्वयम् पक्रेर बुझाएपनि रोहबरमा छाड्दै आएको छ ।’ यहाँ अराजक गतिबिधि गर्नेको संख्या दर्जनौँ रहेको भएपनि प्रहरीको ध्यान नगएको उनको भनाई थियो ।
यता, तरहरा प्रहरी चौकीका ईन्चार्ज प्रहरी नायव निरीक्षक (सई) हेम लिङ्देनले भने आँफू यो बिषयमा गम्भीर भएको प्रतिक्रिया दिदैँ चोरीका घटना बढेको उनले स्वीकार गरे । भने, ‘म यस बिषयमा गम्भीर रहेको छु, अब नियमित सिभिलमा एकजना प्रहरी त्यो एरियामा खटाउँछु ।’ उता, ईलाका प्रहरी कार्यालय इटहरीका प्रहरी उपरीक्षक (डीएसपी) धर्मराज भण्डारीले भने चोरीका घटनामा जानकारी हुनासाथ प्रहरी पुग्ने गरेको प्रतिक्रिया दिए । उनले भने, ‘चोरीको रिपोर्ट आउँनासाथ प्रहरी नजाने भन्ने त किन हुन्थ्यो र ? हामीले यो बिषयमा फलो गरिरहेका छौँ ।’