इटहरी : इटहरीमा नेपाली कांग्रेसका नेता कार्यकर्ताहरूले नगरमा पार्टी नेतृत्वबिहीन अवस्थामा पुगेको बताएका छन् ।
बिहीबार इटहरीको लायन्स क्लबमा आयोजित कार्यक्रममा बोल्दै वक्ताहरूले इटहरी उपमहानगरपालिकामा कांग्रेस नेतृत्वबिहीन भएको बताएका हुन्
। पार्टी सभापति हेमकर्ण पौडेल मेयरमा निर्वाचित भएसँगै कार्यवाहकको जिम्मेवारी पाएका कोवितजंग कार्कीले पार्टीलाई विधान विपरीत चलाएको समेत वक्ताहरूले बताएका थिए ।
कांग्रेस सुनसरी क्षेत्र नं. २ का निवर्तमान सभापति मणिराम श्रेष्ठले प्रजातान्त्रिक पार्टी भएकाले विधिसम्बत चल्नुपर्ने बताए ।
‘पार्टीको बैठक नबसाउने, पार्टीको विधानमा नचल्ने, पार्टीलाई गोजीको पात्रो सम्झिने जस्ता कार्य गर्दा आज यहाँ भेला भएका मानिसहरूले असल बाटोमा हिड्न प्रेरित गरेको हो,’ उनले भने, ‘असल नेताहरूले असल प्रक्रियाबाट जाउन्, असल काम गरुन् भन्ने किसिमले यो सचेतना गराइएको हो ।’
उनले पार्टी नेतृत्वभित्र अहम् हुन नहुने बताउँदै भने, ‘अह्म भयो भने खरानी हुन्छ, पार्टी क्लब सञ्चालन गरेजस्तो होइन, अब इटहरी उपमहानगरमा साबिकका गाविस पनि जोडिएका छन् भन्ने भुल्नुहुँदैन ।’
महाधिवेशन प्रतिनिधि विकास केसीले कसैको विरोध गर्न भन्दा पनि कांग्रेस पार्टीको हित र संगठन बलियो बनाउन भेला राखेको बताए ।
‘समीक्षा बैठक जरुरी छ, पार्टीका केही साथीभाइ चुनावपछि निरुत्साहित छन्,’ उनले भने, ‘हामीले मेयर त जित्यौँ, तर अघिल्लो चुनावमा १२ वटा वडा जित्दा यसपटक कसरी १५ वटा वडा हा¥यौँ, यसको समीक्षा हुने कि नहुने ?’
उनले इटहरीमा कार्यवाहक सभापति कोवितजंग कार्कीले विधानविपरीत कोषाध्यक्ष नियुक्ति गरेकोमा पनि असन्तुष्टि जनाए ।
‘साथीहरूले मलाई थारुको विरोधी हो पनि भने, तर म अहिले पनि इटहरीमा थारुलाई पार्टी सभापति बनाऔँ भनेर प्रस्ताव गर्छु,’ उनले भने, ‘वीपी कोइरालाको सिद्वान्तमा हिड्ने पार्टीका साथीहरूले विधान अनुसार चल्नुपर्छ भन्ने कुरा हो ।’
पार्टी तेरो, मेरो नभनी सबैको बनाउनुपर्नेमा उनको जोड थियो । उनले भने, ‘कतिपय चिया गफमा गुटको राजनीति गर्नेहरूले हामीलाई गुट बनाइस् भन्ने गरेको सुनेको छु, गुट हामीले बनाएका छैनौँ, हामी लोकतान्त्रिक पार्टीलाई मूल्याङ्कन गर्दै महाधिवेशनमा हारलाई स्वीकार गरेर जितेका साथीहरुलाई सघाएर सँगै हिड्छौँ ।’
प्रदेश प्रतिनिधि बबिता चौधरीले इटहरीमा सरकारले थारु जातिलाई उपेक्षा गरेको बताइन् । उनले भनिन्, ‘थारु जातिलाई इटहरी सरकारले पहिलो जातिको घोषणा गरेर ललीपप मात्रै देखायो ।’
निर्वाचन केन्द्रीत रहँदै उनले भनिन्, ‘जहिले पनि दिनेको हात माथि नै हुन्छ, लिनेको हात तल नै हुन्छ, हामीले भोट दिएका छौँ, थारु जातिलाई उपेक्षा नगरियोस् ।’ उनले इटहरीमा थारु जातिलाई प्रथम नागरिक मात्रै होइन, संग्राहलय बनाउन आवश्यक रहेको बताइन् ।
कांग्रेस नेता जगदीश अोलीले कांग्रेसले देशैभर हामी भन्ने बिर्सिएको र म भन्न मात्रै सिकेको अवस्थामा मह गरेर चाकरी प्रथामा पुगेको बताए ।
‘राजनीतिज्ञले वर हुने कि सखुवा हुने भन्ने महत्वपूर्ण कुरा हो,’ उनले भने, ‘कांग्रेस पार्टी विधिबाट चलेन, कसैबाट चल्छ भन्ने विश्वास पनि लाग्न छाडिसक्यो ।’ उनले भुइँमान्छेले नै नेतृत्वलाई सुध्रनका लागि दबाब दिनुपर्ने तर्क राखे ।
कार्यक्रम संयोजक तथा कांग्रेस इटहरी नगरका उपसभापति बालकृष्ण विष्टले पार्टीको महाधिवेशन भएको नौ महिना बितेपनि अहिलेसम्म एकैपटक पनि बैठक बस्न नसकेको बताए ।
‘हामीले पार्टी सभापतिलाई पटकपटक घचघच्याइरह्यौँ, सोही समयमा निर्वाचन नजिकियो,’ उनले भने, ‘आज इटहरीमा कांग्रेसले चुनाव लड्दै गर्दा धेरै ठाउँमा हाम्रै साथीहरूको अन्र्तघातका कारण १५ वटा वडा गुमाउनुपरेको छ ।’
उनले निर्वाचनमा नियतवशकै कारण चुनावमा हराउन लागि पर्नेहरूलाई कारबाही गर्नुपर्ने माग राखे ।
कार्यक्रममा कांग्रेस नेता सन्त डुम्जन, इटहरी १७ का निवर्तमान वडाध्यक्ष भगवानलाल साह, इटहरी २ का वडाध्यक्षका प्रत्याशी राजु बस्नेत, नेविसंघ जनता बहुमुखी क्याम्पसका इकाई सभापति सहदेव काफ्ले लगायतले बोल्दै इटहरीमा पार्टी नेतृत्वबिहीन भएको बताएका थिए ।
Discussion about this post