इटहरी : इलाका प्रहरी कार्यालय इटहरी रहँदा साढे ३३ किलो सुन तस्करी प्रकरणमा फसेका डीएसपी सञ्जय राउतले सफाइ पाएका छन् । मंगलबार (आज) मोरङ जिल्ला अदालतले डीएसपी राउतसहित नौ जनालाई सफाइ दिएको हो । सुन तस्करी प्रकरण लागेको समयमा राउत इटहरी प्रहरीमा कार्यरत थिए ।
तस्करीको साढे ३३ किलो सुन हराएपछि उर्लाबारीका सनम शाक्यको अपहरणपछि हत्या समेत भएको थियो ।
तस्करी प्रकरणका नाइके मध्येका एक चुडामणि उप्रेती ‘गोरे’ समूहले सुन खोज्ने क्रममा शाक्यको हत्या भएपछि तस्करीको र्याकेटकबारे अनुसन्धान सुरु भयो । गृह मन्त्रालयका तत्कालीन सह–सचिव ईश्वरराज पौडेल नेतृत्वको छानविन समितिले प्रकरणमा ९ प्रहरी संलग्न भएको भन्दै पक्राउ गरेर मुद्दा चलायो।
पक्राउ परेका प्रहरीमध्ये ८ जना त्यतिवेलै धरौटी र साधारण तारेखमा छुटेका थिए । तर प्रहरी वरिष्ठ उपरीक्षक (एसएसपी) श्याम खत्री र प्रहरी नायब उपरीक्षक (डीएसपी) सञ्जय राउत हालसम्म कारागारमै थिए । उच्च अदालत, मोरङले २८ भदौ २०७५ मा उनलाई थुनामै राखेर अनुसन्धान प्रक्रिया अघि बढाउन आदेश दिएको थियो ।
त्यसवेला राउतले विमानस्थल प्रहरी कार्यरत रहँदा गोरे समूहबाट १२ लाख रुपैयाँ लिएर तस्करीमा सहयोग गरेको सरकारी छानविन समितिले दाबी गरेको थियो ।
एसएसपी खत्रीलाई पनि ५ माघ २०७५ मा उच्च अदालतले थुनामै राखेर प्रक्रिया अघि बढाउन आदेश दिएको थियो । सरकारी छानविन समितिले खत्रीले तीन पटक गरेर १ करोड १२ लाख ४२ हजार रुपैयाँ बुझेको बताएको थियो ।
अदालतले दुवै जनालाई तीन वर्षपछि सफाइ दिएको छ । प्रकरणमा मुछिएका पूर्वएआईजी गोविन्द्रप्रसाद निरौला, एसएसपी दिवेश लोहोनी (हाल डीआईजी), प्रहरी उपरीक्षक (एसपी) विकासराज खनाल, प्रहरी नायब उपरीक्षक (डीएसपी) प्रजित केसी, प्रहरी नायब निरीक्षक (सई) बालकृष्ण सञ्जेल, प्रहरी हवल्दार अमरबहादुर थापा मगर र प्रहरी जवान विष्णु खड्काले सफाइ पाएका छन् ।
Discussion about this post