बराहक्षेत्र : सुनसरीको बराहक्षेत्र नगरपालिकाले आर्थिक वर्ष २०८२।८३ का लागि १ अर्ब ६ लाख ९५ हजार ३ सय ७५ रुपैयाँको बजेट सार्वजनिक गरेको छ।
सोमबार बसेको नगरपालिकाको १६औं नगर सभामा उपप्रमुख नन्दकुमारी सुनुवारले बजेट प्रस्तुत गरेकी हुन्।
बजेटसँगै सार्वजनिक नीति तथा कार्यक्रममा नगर प्रमुख रमेश कार्कीले स्वास्थ्य, शिक्षा, कृषि, पर्यटन प्रवद्र्धन र पूर्वाधार विकासलाई मुख्य प्राथमिकतामा राखिएको जानकारी गराए ।
“नगरको जिम्मेवारी, गुणस्तरीय स्वास्थ्य सेवा” भन्ने सन्देशसहित सार्वजनिक बजेटमा सबै नगरवासीलाई सर्वसुलभ, सहज र समान स्वास्थ्य सेवा सुनिश्चित गरिने उल्लेख छ।
चतरा र नगर अस्पतालमा आवश्यक भौतिक पूर्वाधार निर्माण, एम्बुलेन्स तथा शववाहन परिचालन र व्यवस्थापन, सुरक्षित मातृत्व तथा प्रजनन स्वास्थ्य प्रवर्द्धन लगायतका योजनाहरू अघि सारिएको छ।
घरदैलोमा स्वास्थ्य सेवा पुर्याउने उद्देश्यले प्रत्येक वडामा स्वास्थ्यकर्मीको व्यवस्थापन, दीर्घरोगी तथा जेष्ठ नागरिकको नियमित स्वास्थ्य परीक्षण, पाँच वर्ष मुनिका बालबालिकाका लागि पोषण कार्यक्रम, निःशुल्क स्वास्थ्य बीमा, रगत आपूर्तिमा सहयोग लगायतका कार्यक्रम घोषणा गरिएको छ।
चतरा र मधुवन स्वास्थ्य केन्द्रको स्तरोन्नति गरिने, नगर अस्पताललाई ५० शैय्याको सुविधासम्पन्न अस्पतालका रूपमा विकास गर्न संघीय सरकारसँग समन्वय गरिने बताइएको छ।
शिक्षामा अनिवार्य र निःशुल्क शिक्षाको अवधारणालाई निरन्तरता दिँदै नगरले “छोरी र बुहारी, शिक्षा हाम्रो आधार” अभियान अघि सारेको छ।
शिक्षा क्षेत्रमा उपचारात्मक कक्षा, अभिभावक शिक्षा कार्यक्रम, विज्ञान तथा प्रविधिमा आधारित शिक्षाको विस्तार, संस्कारयुक्त गुणस्तरीय शिक्षालाई जोड दिइएको छ।
पढ्दै कमाउँदै कार्यक्रम, चतरा र भरौलका विद्यालयमा प्राविधिक धार खुलाउने, सप्तकोशी र वराह क्याम्पसमा स्नातकोत्तर तह सञ्चालनका लागि समन्वय, विद्यालयको आधारभूत पूर्वाधार सुधार, शिक्षक अभिमुखिकरण, नतिजामा आधारित प्रोत्साहन, अन्तर्क्रिया र अनुगमनजस्ता कार्यक्रम समावेश गरिएका छन्।
नीति तथा कार्यक्रममा कृषि उत्पादन, पूर्वाधार विकास र धार्मिक पर्यटन प्रवर्द्धनमा पनि विशेष जोड दिइएको छ।
“धरतीको पहिलो तीर्थ बराहक्षेत्र जाऔं” भन्ने सन्देशका साथ धार्मिक पर्यटन प्रवर्द्धन गर्ने, पूर्वाधार विकासका परियोजनालाई गति दिने तयारी रहेको मेयर कार्कीले बताए ।
उनका अनुसार स्वास्थ्यलाई पहिलो प्राथमिकता दिएको नगरपालिकाले शिक्षालाई समृद्धिको आधार बनाउने, कृषि र पर्यटनलाई आयको स्रोत बनाउने दृष्टिकोण राख्दै नीति तथा कार्यक्रम सार्वजनिक गरेको हो।
Discussion about this post