धरान : धरान उपमहानगरपालिका–१५ स्थित एक ट्याटु हाउसबाट ठूलो परिमाणमा लागूऔषध बरामद भएको छ।
ब्राउनसुगर र विभिन्न किसिमका ट्याब्लेटसहित सात जनालाई प्रहरीले नियन्त्रणमा लिएको छ।
विशेष सूचनाको आधारमा इलाका प्रहरी कार्यालय धरान र अस्थायी प्रहरी चौकी बरगाछीबाट खटिएको संयुक्त प्रहरी टोलीले धरान–१५, बद्रिनाथ मार्गस्थित योजन राईले सञ्चालन गर्दै आएको ट्याटु हाउसमा छापा मारेको थियो।
खानतलासीका क्रममा प्रहरीले ब्राउनसुगर ६८० मिलिग्राम, ट्रमाडोल एक हजार ५४ थान, कालिइरो ९८५ थान, र डेकोल्मिन ३४ थान बरामद गरेको छ।
प्रहरीका अनुसार पक्राउ पर्नेमा ट्याटु हाउस सञ्चालक धरान १५ का ३७ वर्षीय योजन राई, सोही ठाउँका २७ वर्षीय दिपेन मगर, २१ वर्षीय जगत मगर, ३३ वर्षीय कृष्ण राई, ३२ वर्षीय सुरज कार्की, धरान ८ का २४ वर्षीय सोमत राई र सोही ठाउँका १९ वर्षीय असीम राई रहेका छन्।
उनीहरूलाई हाल इलाका प्रहरी कार्यालय धरानमा राखेर थप अनुसन्धान भइरहेको प्रहरीले जनाएको छ।
Discussion about this post