इटहरी : सुनसरी र झापामा लागूऔषध बेचबिखनमा संलग्न दुई जनालाई प्रहरीले नियन्त्रणमा लिएको छ ।
विशेष सूचनाका आधारमा झापाको बिर्तामोड नगरपालिका–२ मा रहेको दिवाकर फर्मामा खटिएको लागूऔषध नियन्त्रण ब्यूरो काँकडभिट्टा र इलाका प्रहरी कार्यालय अनारमनीको संयुक्त टोलीले फर्मामा खानतलासी गर्दा प्रतिबन्धित औषधि बरामद गरेको हो ।
प्रहरीले उक्त फार्मेसीबाट ट्रामाडोल ३ हजार क्याप्सुल र प्रेजेक्स ३ सय क्याप्सुल फेला पारेको जनाएको छ । सो क्रममा फर्मा सञ्चालक किरण राजवंशीलाई समेत पक्राउ गरिएको प्रहरीले जनाएको छ ।
त्यसैगरी सुनसरीको इनरुवा नगरपालिका–४ मा नियमित चेकजाँचका क्रममा जिल्ला प्रहरी कार्यालय सुनसरीको टोलीले बा ४६ प ८४०२ नम्बरको मोटरसाइकल चालकलाई नियन्त्रणमा लिएको छ ।
पक्राउ पर्नेमा मोरङको बेलबारी नगरपालिका–४ का ४० वर्षीय इन्द्रबहादुर गुरुङ रहेका छन् । उनलाई प्रहरीले १६ ग्राम ३५ मिलिग्राम ब्राउनसुगरसहित पक्राउ गरेको हो ।
पक्राउ परेकाहरूमाथि थप अनुसन्धान जारी रहेको जिल्ला प्रहरी कार्यालयले जनाएको छ ।
Discussion about this post