विराटनगर : अवैध हुण्डी कारोबार भइरहेको विशेष सूचनाका आधारमा सक्रियता बढाएको प्रहरीले विराटनगरमा एक जनालाई स्रोत नखुलेको नगद रकम र सवारी साधनसहित पक्राउ गरेको छ।
इलाका प्रहरी कार्यालय रानीबाट प्रहरी सहायक निरीक्षक नवराज कार्कीको नेतृत्वमा खटिएको प्रहरी टोलीले विराटनगर महानगरपालिका–१५ स्थित सुनसरी ट्रेडिङ सेन्टर अगाडिबाट विराटनगर–६ का अरबिन्द्र अग्रवाललाई नियन्त्रणमा लिएको हो।
उनी प्रदेश नम्बर १–०४–००१ च ०१६४ नम्बरको सेतो रंगको कारमा भारततर्फबाट हुण्डीमार्फत ल्याइएको रकम बोकेर विराटनगरतर्फ आइरहेको प्रहरीको दाबी छ।
प्रहरीका अनुसार अग्रवालको गतिविधि शंकास्पद देखिएपछि विशेष निगरानी राखिएको थियो।
रानीबाट विराटनगरतर्फ आउँदै गर्दा वडा नम्बर १५ मा रोकेर जाँच गर्ने क्रममा भाग्न खोजेपछि उनलाई नियन्त्रणमा लिइएको हो।
उनको साथबाट स्रोत नखुलेको ६ लाख रुपैयाँ नेपाली नगद बरामद गरिएको छ भने प्रयोग गरिएको कारसमेत प्रहरीले नियन्त्रणमा लिएको छ।
बरामद रकम र सवारी साधनसहित अग्रवाललाई इलाका प्रहरी कार्यालय रानीमा राखी थप अनुसन्धान भइरहेको प्रहरीले जनाएको छ।
प्रहरी स्रोतका अनुसार सीमा क्षेत्र प्रयोग गरी अवैध हुण्डी कारोबार बढ्दै गएको सूचनापछि निगरानी बढाइएको छ।
Discussion about this post