इटहरी : सुनसरीको कोशी गाउँपालिका–१ लौकहीमा सशस्त्र प्रहरीको गोली प्रहारबाट स्थानीयवासीको मृत्यु भएको घटनाका विषयमा इन्सेक कोशी प्रदेश कार्यालय, विराटनगरले स्थलगत अनुगमन तथा तथ्य सङ्कलन गरेको छ।
अनुगमन टोलीले पीडित परिवार, स्थानीयवासी, नेपाल प्रहरी र सशस्त्र प्रहरीका जिल्ला प्रमुख, अन्य सुरक्षाकर्मी, छानबिन समिति, मृतकका आफन्त, जनप्रतिनिधि तथा नागरिक समाजका सदस्यहरूसँग भेटघाट तथा छलफल गर्दै घटनास्थलको अवलोकन र तथ्य सङ्कलन गरेको हो।
सशस्त्र प्रहरीको गोली लागेर पुस १७ गते बिहान करिब १ बजेतिर स्थानीय ४५ वर्षीय विजय साहको घटनास्थलमै मृत्यु भएको थियो।
अनुगमन टोलीले मृतकका पत्नी, छोरा, दाजु र दिदीहरूसँग छलफल गर्नुका साथै जिल्ला प्रहरी कार्यालय सुनसरीका एसपी केशवकुमार थेवे, सशस्त्र प्रहरी बल नेपाल नम्बर ४ गण मुख्यालयका एसपी निर्मलकुमार थापा, डीएसपी सीताराम पौडेल, सशस्त्र प्रहरी बल नेपाल बोर्डर आउट पोष्ट लौकहीका इन्स्पेक्टर भूपबहादुर खड्का र देवराज भट्टराईसँग भेट गरी घटनाका विषयमा जानकारी लिएको छ। साथै, जिल्ला प्रशासन कार्यालयद्वारा गठन गरिएको छानबिन समितिसँग पनि छलफल गरिएको छ।
गोली प्रहार घटनाका आरोपित सशस्त्र प्रहरी हवल्दारलाई नियन्त्रणमा लिएर अनुसन्धान थालिएको र उनका सहयोगी सशस्त्र प्रहरीलाई समेत सोधपुछ गरिने एसपी थेवेले अनुगमन टोलीलाई जानकारी दिए।
मृतककी पत्नी गीतादेवी साहसँग पुस १७ गते जिल्ला प्रशासन कार्यालयमा भएको सहमति अनुसार न्यायिक प्रक्रिया अघि बढाइने पनि उनले बताए।
सहायक प्रमुख जिल्ला अधिकारी नरेन्द्र परियारको नेतृत्वमा तीन सदस्यीय छानबिन समिति गठन गरिएको र सो समितिले सात दिनभित्र घटनाको यथार्थ सार्वजनिक गर्ने एसपी थेवेले जानकारी दिए ।
उनका अनुसार घटनापछि उत्पन्न तनाव नियन्त्रण गर्न नेपाल प्रहरीले करिब दुई सय सेल अश्रुग्यास र हवाइ फायर गरेको थियो।
गोली प्रहारपछि आक्रोशित प्रदर्शनकारीले दुई वटा अस्थायी पोष्टमा आगजनी गर्नुका साथै बिओपी कार्यालय लौकहीमा ढुङ्गा र पेट्रोल बम प्रहार गर्दा सशस्त्र प्रहरी सहायक निरीक्षकसहित १२ जना घाइते भएका र तीन वटा सवारी साधनमा क्षति पुगेको सशस्त्र प्रहरीका एसपी थापाले जानकारी दिए।
सशस्त्र प्रहरीका अनुसार चिनी तस्करी गरिरहेको अवस्थामा नियन्त्रण गर्ने क्रममा चलेको गोली लागेर साहको मृत्यु भएको हो।
सशस्त्र प्रहरी डीएसपी पौडेलका अनुसार लौकहीमा छोकोटी भन्सार कार्यालय मात्र रहेकाले पाँच हजार रुपैयाँसम्म मात्रै भन्सार काट्न मिल्ने व्यवस्था छ।
रातिको समयमा सोभन्दा बढी तस्करी भएको आशंकामा नियन्त्रणको प्रयास गर्दा उक्त घटना भएको उनको भनाइ छ।
मृतकका दाजु रामचन्द्र साहले राति १ बजे चार पटक गोली चलेको आवाज सुन्दा सुरुमा पटाका पड्किएको ठानेको तर केहीबेरमै छिमेकीबाट फोन आएपछि घटनास्थल पुगेको बताए।
उनका अनुसार घटनास्थल पुग्दा विजको शव सिटी सफारीको चालक सिटमा ढल्किएको अवस्थामा थियो।
आरोपित सशस्त्र प्रहरी हवल्दार नवराज खतिवडाले फोनमार्फत घटनाबारे जानकारी दिँदै छटपटाइरहेको देखिएको उनको भनाइ छ। अनुगमन टोलीले घटनास्थल वरपरका स्थानीयवासीसँग समेत विस्तृत जानकारी लिएको छ।
इन्सेक कोशी प्रदेश संयोजक मनोहर कुमार पोखरेलको नेतृत्वमा गरिएको अनुगमन टोलीमा मानव अधिकार रक्षक सञ्जाल कोशीका संयोजक देवी बास्कोटा, इन्सेक सुनसरी प्रतिनिधि जयकृष्ण यादव, अधिकारकर्मी चुन्नी खातुन तथा पत्रकार अनिल श्रेष्ठ र पवन रौनियार सहभागी थिए।
यो पनि – सुनसरीमा मध्यराति गोली प्रहारबाट एक पुरुषको हत्या
यो पनि – सशस्त्रको गोलीबाट मृत्यु भएपछि सुनसरी तनावग्रस्त, छानबिन समिति गठन
यो पनि – सशस्त्र प्रहरीको गोली प्रहारबाट मृत्यु प्रकरण : सुनसरीको अवस्था सामान्य
यो पनि – सुनसरीमा गोली हान्ने एपीएफ हवल्दार पक्राउ, बीओपीमा कार्यरत सबै कर्मचारीलाई फिर्ता बोलाइयो
Discussion about this post