चतराको आइसोलेसनबाट संक्रमितको लागि प्रयोग भएका सामाग्री चोरी, चोरीमा संक्रमित नै संलग्न

सुनसरीको बराहक्षेत्र आइसोलेसन सेन्टरमा सङ्क्रमितहरूका लागि उपलब्ध गराइएको विभिन्न सामाग्रीहरू चोरी भएका छन् ।

१ सय बेडको आइसोलेसन सेन्टरमा प्रत्येक संक्रमतिहरुलाई उपलब्ध गराइएको इलेक्ट्रीक जगदेखि चप्पलसम्म चोरी भएका हुन् ।

चोरी भने अरू कसैले नभई स्वयम सङ्क्रमितहरूले नै गरेका हुन् ।

सङ्क्रमितहरू डिस्चार्ज भएर घर फर्किएपछि स्वास्थ्यकर्मीको टोलीले उनीहरू बसेको कोठा स्यानिटाइज गर्ने क्रममा सामानहरू चोरी भएको भेटिएको हो ।

बराहक्षेत्र आइसोलेसन सेन्टरका इन्चार्ज प्रमोद यादवले सङ्क्रमितहरूले सेन्टरको एक लाख भन्दा बढी मूल्यको सामान चोरी गरी लगेको जानकारी दिए ।

चतराधाम स्थित आइसोलेसन सेन्टरमा भदौ १६, २४ र असोज १ गते डिस्चार्ज भएका मध्ये असोज १ गते डिस्चार्ज भएको टोलीले सामान चोरी गरी लगेको दाबी गरे ।

यादवका अनुसार सेन्टरमा रहेको ४७ वटा ज्वरो नाप्ने थर्मामिटर, २३ वटा तातो पानी तताउन प्रयोग हुने इलेक्ट्रीक जग, ३५ वटा कम्बल, ३५ वटा झुल, १२ वटा सिरानीको खोल, ८६ वटा तन्ना, २१ वटा मल्टीप्लक र १०० जोर चप्पल चोरी भएको बताए ।

‘पाँच जना मात्र सङ्क्रमित रहेको अवस्थामा शनिवार कोठा सफा गर्ने क्रममा स्वास्थ्यकर्मीको टोलीले सामान खोजी गर्दा नभेटेको हो’ उनले भने ‘कोठामा नभेटिएका सामान संक्रमितहरुले नै लानु भएको रहेछ ।’

सामान चोरी भएको विषयमा बराहक्षेत्र नगरपालिकालाई जानकारी समेत गराइसकेको आइसोलेसन सेन्टरका इन्चार्ज यादवले बताए । ‘यो अत्यन्त लज्जास्पद काम हो । यसमा सुरक्षाकर्मीदेखि उघोगका मजदुर जो सङ्क्रमित भएर यहाँ बस्नु भयो, वहाँहरूकै संलग्नता छ ।’ ‘नगरपालिकाले प्रहरी प्रशासनलाई जानकारी गराइ घटनाको छानबिन गरिनुपर्छ ।’

असोज १ गते डिस्चार्ज हुनेहरूमा नेपाल प्रहरीका ४१, सशस्त्र प्रहरीका १२ र प्रगति टेक्स्ट टायलका १४ जना सङ्क्रमित थिए ।

यस्तै सामान चोरीसँगै आइसोलेसन सेन्टरका धारा तथा शौचालय तोडफोड भएको समेत बताइएको छ । यहाँसम्मकी शौचालय भित्र सिरानी हाल्दिनुको साथै धाराको पाइप काट्ने जस्ता कार्य भएको बताइएको छ ।

सङ्क्रमितहरूलाई राख्नको लागि बराहक्षेत्र नगरपालिकाले निर्माण गरेको सेन्टरमा भएको चोरीका विषयमा छानबिन हुने सुनसरीका प्रहरी प्रमुख कमल थापाले जानकारी दिए । कोरोना सङ्क्रमित सुरक्षाकर्मी समेत रहेको उक्त सेन्टरमा बस्ने सबैको विवरण झिकाइएको उनले बताए ।

घटनाको विषयमा नगरपालिकासँग समन्वय गरेर छानबिन गर्ने र सुरक्षाकर्मी समेत यस घटनामा संलग्न भएका विभागीय कारबाही हुने प्रहरी उपरीक्षक थापाले जानकारी दिए ।

यता बराहक्षेत्र नगरपालिकाका मेयर निलम खनालले सामान चोरी भएको विषयमा प्रमुख जिल्ला अधिकारीलाई जानकारी गराइसकेको बताउँदै यस घटनामा नगरपालिकाको गम्भीर ध्यानाकर्षण भएको जानकारी दिए ।

‘प्रहरी र हाम्रो स्वास्थ्यकर्मीको टोलीले भदौ २४ र असोज १ गते डिस्चार्ज भएकाहरूको विवरण निकाल्दै छौ’ खनालले भने ‘यसमा संलग्न जो कोहीलाई भए पनि उनीहरूलाई कानुनी दायरामा ल्याउनेछौ ।’

अपराधन्यूजबाट साभार ।