विराटनगर : विराटनगरस्थित कोशी अस्पतालले वर्षौंदेखि अतिक्रमणमा परेको आफ्नै स्वामित्वको सरकारी जग्गा फिर्ता लिने प्रक्रिया अगाडि बढाएको छ।
अस्पताल प्रशासनले अनधिकृत रूपमा निर्माण गरिएका घरटहरा तथा अन्य स्थायी संरचना १५ दिनभित्र हटाउन सार्वजनिक सूचना जारी गर्दै अतिक्रमण हटाउने अभियान सुरु गरेको हो।
अस्पतालका अनुसार नापी कार्यालय मोरङको फिल्ड रेखांकन प्रतिवेदनले अस्पतालको नाममा दर्ता रहेका कित्ता नम्बर ११, १२, १५, २२, २३ र २६ को जग्गामा विभिन्न व्यक्ति तथा संस्थाले अनुमति बिना स्थायी संरचना निर्माण गरी अतिक्रमण गरेको पुष्टि गरेको छ।
सोही प्रतिवेदनका आधारमा अस्पतालले सम्बन्धित सबै पक्षलाई १५ दिनभित्र अतिक्रमित जग्गा र संरचना स्वेच्छाले खाली गर्न आग्रह गरेको छ।
अस्पताल प्रशासनले तोकिएको समयभित्र जग्गा खाली नगरिए प्रचलित कानुनअनुसार सरकारी जग्गा खाली गराउने प्रक्रिया अघि बढाइने स्पष्ट गरेको छ।
अस्पताल परिसरको जग्गा संरक्षणसँगै भविष्यमा स्वास्थ्य सेवा विस्तार, पूर्वाधार निर्माण तथा सेवा प्रवाहलाई व्यवस्थित बनाउन अतिक्रमण हटाउने प्रक्रिया सुरु गरिएको अस्पताल स्रोतले जनाएको छ।
Discussion about this post