इटहरी : सुनसरीको झुम्का कारागारबाट फरार भएका कैदी सिराहामा लागूऔषध ब्राउनसुगरसहित पक्राउ परेका छन्।
प्रहरीको गोली प्रहारपछि नियन्त्रणमा लिइएका ६ जनामध्ये एक जना २५ वर्ष कैद सजाय पाएका फरार कैदी रहेको खुलेको छ भने अर्काविरुद्ध ज्यान मार्ने उद्योगका दुई वटा मुद्दा दर्ता रहेको प्रहरीले जनाएको छ।
लागूऔषध नियन्त्रण ब्यूरो काठमाडौंको टोलीले बिहीबार लहानस्थित हस्पिटल चोकमा अपरेशन सञ्चालन गरी पक्राउ परेकामध्ये सप्तरीको रुपनी गाउँपालिका–१ का ४२ वर्षीय महम्द नाजिर मियाँ ज्यानसम्बन्धी कसुरमा दोषी ठहर भई २५ वर्ष कैद सजाय भोगिरहेका व्यक्ति रहेको खुलेको हो।
उनी २०८२ भदौ २४ गते जेनजी आन्दोलनका क्रममा झुम्का कारागारबाट फरार भएका थिए।
यस्तै, पक्राउ परेका सप्तरीको बोदेबर्साइन नगरपालिका–२ का शम्भुप्रसाद यादवविरुद्ध २०७७ साउन १३ र २०८२ फागुन ५ गते दर्ता भएका ज्यान मार्ने उद्योगसम्बन्धी दुई मुद्दा रहेको सिराहा प्रहरीले जनाएको छ। ती दुवै घटनापछि उनी फरार रहँदै आएका थिए।
प्रहरीले सोही घटनामा बैजनाथप्रसाद यादव, जमाहिर आलम, मोहम्मद इमामुद्दिन तथा भारतको बिहारका विद्यानन्द यादवलाई पनि नियन्त्रणमा लिएको छ।
पक्राउ परेकाहरूको साथबाट २४३ ग्राम ब्राउन सुगरबरामद भएको प्रहरीले जनाएको छ। घटनाबारे थप अनुसन्धान भइरहेको प्रहरीले जनाएको छ।
Discussion about this post