विराटनगरको दूधफारम नजिकै लहरीले अटो टेम्पोलाई ठक्कर दिँदा एक जनाको मृत्यु ,अन्य दुई जना गम्भिर घाइते

विराटनगर महानगरपालिका–३ दूधफारम नजिकै भारतीय नम्बरको लहरीले अटो टेम्पोलाई ठक्कर दिँदा शुक्रबार दिउँसो भएको दुर्घटनामा परि एक जनाको मृत्यु भएको छ । दुर्घटनामा परेर एक पुरुष र एक महिला गम्भीर घाइते भएका छन् ।

दुर्घटनामा परेर मृत्यु भएकी अन्दाजी ३५÷४० वर्षीया महिलाको पहिचान खुलेको छैन । उनको नोबेल शिक्षण अस्पतालमा उपचारको क्रममा ज्यान गएको प्रहरीले जनाएको छ । गम्भीर अवस्थाका घाइतेहरुको पनि पहिचान खुल्न सकोको छैन । घाइतेमध्ये पुरुष अटोका चालक हुन् । दुवै घाइतेको नोबेल शिक्षण अस्पतालमा उपचार भइरहेको छ ।

सुनसरीको दुहवीतिरबाट आउँदै गरेको एनएल ०२–एन ४४८७ नम्बरको भारतीय लहरीले सोही दिशाबाट आउँदै गरेको को ३ ह २८१२ नम्बरको अटो टेम्पोलाई दूध फारम नजिकैको स्थानमा ठक्कर दिँदा दुर्घटना भएको प्रहरीले जनाएको छ । प्रहरीले तीव्र गतिमा रहेको लहरीले नियन्त्रण गुमाउँदा दुर्घटना भएको जनाको छ ।

दुर्घटनाबाट टेम्पोमा पूर्ण रुपमा क्षति पुगेको छ भने लहरी सडकबाट पल्टिएर खेतमा पुगेको छ । प्रहरीले लहरीका चालकलाई नियन्त्रणमा लिएर घटना बारे थप अनुसन्धान सुरु गरिएको जनाएको छ ।