सुनसरीमा यस्तो छ प्रहरीको चाडपर्व लक्षित सुरक्षा योजना (कहाँ कति प्रहरी खटिए?)

इटहरी : नेपालीहरुको चाडबाड नजिकिएसँगै जिल्ला प्रहरी कार्यालय सुनसरीले विशेष सर्तकता अपनाउनका लागि सुरक्षा योजना सार्वजनिक गरेको छ ।

चाडबाडको समयमा हुने सम्भावित घटनाहरुलाई मध्यनजर गर्दै विभिन्न ठाउँमा प्रहरीहरु परिचालन समेत गरिएको छ । जिल्लामा हाल प्रहरी उपरीक्षक एकजना, प्रहरी नायव उपरीक्षक तीनजना, प्रहरी निरीक्षक ११ जना गरी १२ सय प्रहरी परिचालन गरिएको छ ।

जिल्ला प्रहरी प्रमुख प्रहरी उपरीक्षक (एसपी) कमल थापाका अनुसार चाडपर्वको नाममा मानिहरुको गतिविधि बढी हुने, आर्थिक र धार्मिक गतिविधिहरु बढ्ने र अपराधको घटनाहरु समेत हुन सक्ने भएकाले विशेष सर्तकता अपनाईएको छ ।

‘जिल्लाभरीको सम्पुर्ण सुरक्षाको अवस्था अनुगमन गर्नको लागि जिप्रकाबाट टोली परिचालन सुरु गरिएको छ,’ एसपी थापाले टाकुरा न्यूजसँग फोन सम्पर्कमा भने, ‘जिल्लाका मुख्य बजार, चौक, भित्री एरिया लगायत समग्र क्षेत्रलाई सुरक्षित बनाउँने क्रममा जिल्लाभरीमा ९५ वटा पिकेटको व्यवस्था गरिएको छ ।’

विशेषगरी अपराधिक क्रियाकलाप हुन नदिनका लागि सुरक्षा योजना ल्याईएको उनले बताए । ‘अपराधिक क्रियाकलाप नियन्त्रण गर्नका लागि सुरक्षा योजना ल्याईएको हो,’ थापाले भने, ‘जुवा तास खेल्नेलाई नियन्त्रण तथा झै झगडा हुन नदिनका लागि पनि हामीले सुरक्षा योजना ल्याएका हौँ ।’

पछिल्लो समय सुनसरीमा पनि कोरोनाको ग्राफ बढेकाले आफ्नै घरमा बसेर दसैँ मान्न उनले निर्देशन दिए । ‘सामाजिक अपराध न्यूनीकरण गर्नु हाम्रो दायित्व हो, त्यसमा सचेत बन्न पनि अपिल गरिन्छ,’ उनले भने ।

उनका अनुसार राजमार्ग तथा भित्री बाटोमा कुनै किसिमको दुर्घटना हुन नदिनका लागि जिल्लाभरीमा ३० वटा चेकिङको व्यवस्था गरिएको छ । जस्ले उपयुक्त स्थान र टिम फरक पारेर पूर्व–पश्चिम राजमार्गमा, कोशी राजमार्गमा र भित्री सडकहरुमा चेकिङ गर्ने व्यवस्था गरिएको छ ।

साथै जिल्लाबाट बाहिरिने तथा भित्रिने लामो दूरी तथा छोटो दूरीको सवारी साधनहरुमा यात्रा गर्ने यात्रुहरुको समस्या सामाधान तथा सुरक्षार्थ इनरुवा नगरपालिका ४ बसपार्क, धरान उपमहानगरपालिका २ भानुचौक, इटहरी उपमहानगरपालिका ९ बसपार्क, दुहवी नगरपालिका ८ फुटबल चौक, इटहरी उपमहानगरपालिका १७ कान्छी चौक, पकलीमा यात्रु सहायता कक्षको समेत स्थापना गरिसकिएको जिल्ला प्रहरी कार्यालय सुनसरीले जनाएको छ ।

त्यस्तै, अपराधिक कार्य गर्नेहरुलाई पक्राउ गर्न, सूचना सङ्कलन गर्न लगायतका काममा परिचालन हुने गरी १० वटा सादा पोसाक टोली समेत परिचालन गरिएको छ ।

धार्मिक स्थल सुरक्षा–

मन्दिरमा विशेष गरी पूजा गर्न आउने भक्तजनहरुको सुरक्षाको लागि धेरै पूजा हुने स्थानहरुको यकिन गरी उक्त स्थानमा रहेको प्रहरी युनिटहरुबाट परिचालन हुने गरी ७५ जनाको १५ वटा टोलीको व्यवस्था मिलाईएको छ ।

जसले मन्दिरमा भीडभाड हुन नदिने तथा कुनै किसिमका मेला लगायतका भीडभाड जन्य गतिविधिहरुलाई नियन्त्रण गरिने सुनसरी प्रहरीको योजना रहेको छ ।