इटहरी : हिसान एन्फा सुनसरी कप अन्तर विद्यालय फुटबल प्रतियोगिताको उपाधि पूर्वाञ्चल कलेजले जितेको छ ।
इटहरी तालतलैयास्थित बुढासुब्बा खेल मैदानमा शुक्रबार सम्पन्न फाइनल खेलमा सुष्मा कलेजलाई १–० गोलको जीत निकाल्दै पूर्वाञ्चलले उपाधि जितेको हो ।
पूर्वाञ्चललाई उपाधि जिताउन सिजल राईले दोस्रो हाफको ५ औं मिनेटमा गरेको गोल नै निर्णायक बन्यो । उपाधिसंगै पूर्वाञ्चलले नगद ३० हजार रुपैयाँ र शिल्ड हात पारेको छ ।
उपविजेता बनेको सुष्मा कलेजले १५ हजार रुपैयाँ पाएको छ । फाइनल खेलको म्यान अफ दि म्याच पूर्वाञ्चलका कैलाश भुजेल भए । उनले नगद एक हजार रुपैयाँ पाए ।
प्रतियोगिताको सर्वोत्कृष्ट खेलाडी तथा उच्च गोलकर्ता पूर्वाञ्चलका सिजल राई घोषित भए । उनले सर्वोत्कृष्ट भएबापत नगद पाँच हजार र उच्च गोलकर्ताको तीन हजारसहित आठ हजार पुरस्कार पाए ।
पूर्वाञ्चलकै सुमित राई बेस्ट गोल किप्पर, सक्षम प्रधान बेस्ट मिडफिल्डर र सजीवन राई बेस्ट प्रशिक्षक घोषित भए । सुष्मा कलेजका देवराज श्रेष्ठ बेस्ट फरवार्ड र युसन राई बेस्ट डिफेन्स घोषित भए । उनीहरूले जनही नगद २–२ हजार रुपैया पाए ।
विजेता तथा उपविजेता खेलाडीहरूलाई प्रमुख अतिथि हिसान केन्द्रिय सल्लाहकार लेखनाथ घिमिरे, सुनसरी अध्यक्ष सागर भटराई, सचिव सुभाष लुईटेल, एन्फा सुनसरी वरिष्ठ उपाध्यक्ष भेषराज कार्की, महासचिव कोबिदजंग कार्की, सदस्य प्रकाश कोइराला लगायतले पुरस्कार वितरण गरे ।
अखिल नेपाल फुटबल संघ एन्फा सुनसरी र उच्च माध्यमिक शिक्षालय संघ हिसान सुनसरीको संयुक्त आयोजनामा माघ १२ गतेदेखि भएको प्रतियोगितामा सुनसरीका २३ वटा उच्च माविहरूको सहभागीता रहेको थियो ।
क्रिकेटको उपाधि विश्व आदर्शलाई
हिसान सुनसरीको स्पोर्टस् मिट अन्तर्गत क्रिकेट प्रतियोगिताको उपाधि विश्व आदर्श कलेजले जितेको छ ।
शुक्रबार सम्पन्न फाइनल खेलमा विश्व आदर्शले स्मल हेभन कलेजलाई ५ विकेटले पराजित गर्दै उपाधि जितेको हो ।
टस जितेर पहिला ब्याटिङ गरेको स्मल हेभनले निर्धारित १२ ओभरको खेलमा ५ विकेट गुमाउदै ८५ रन जोडेको थियो ।
प्रतिउत्तरमा ८६ रनको विजयी लक्ष्य पछ्याएर जवाफी ब्याटिङ गरेको विश्व आदर्शले १० दशमलव २ बलमा ५ विकेट गुमाउदै जीत हात पारेको हो ।
माघ १३ गतेदेखि भएको क्रिकेट प्रतियोगितामा सुनसरीका ११ वटा कलेजहरूको सहभागीता रहेको थियो ।
Discussion about this post