इटहरी : जेनजी आन्दोलन उत्कर्षमा पुगेको समयमा कोशी प्रदेशमा राजनीतिक नेतृत्वले निर्वाह गरेको भूमिकामाथि पुनः प्रश्न उठ्न थालेको छ।
कोशी प्रदेशका निवर्तमान आन्तरिक मामिला तथा कानुन मन्त्री रेवतीरमण भण्डारीलाई लक्षित गर्दै सुनसरीका विद्यार्थी नेता उज्वल सिग्देलले आन्दोलनका बेला राज्य संयन्त्र र जिम्मेवार पदमा बसेकाहरूले देखाएको व्यवहारप्रति प्रश्न उठाएका हुन्।
सिग्देलले सामाजिक सञ्जालमार्फत् टिप्पणी गर्दै मन्त्री भण्डारीको निवास आसपास भएको आगजनी, हिंसा र नागरिकको मृत्युका घटनालाई स्मरण गराउँदै नेतृत्वको संवेदनहीनता उजागर भएको बताएका छन्।
उनले लेखेका छन्, “एक जना मन्त्री जसको घरबाट करिब एक सय मिटर छेउमा भएको नगरपालिकाको कार्यालय जलेर खरानी भयो। उहाँकै घर आसपास निर्दोष नागरिकहरू मारिए। उहाँको नगरमा भएका लगभग सम्पूर्ण सरकारी कार्यालय खरानी भए। तर उहाँ (रेवतीरमण भण्डारी) मेरो घर जलेन, छिमेकीहरूले बचाइदिए भनेर भनेर उत्सव मनाइरहनु भएको थियो।”
आन्दोलनका क्रममा जनधनको क्षति भइरहँदा जिम्मेवार व्यक्तिहरू आत्मकेन्द्रित अभिव्यक्तिमा सीमित हुनु दुःखद् भएको सिग्देलले टिप्पणी गरेका छन्।
सिग्देलका अनुसार जेनजी आन्दोलन तोडफोड र अराजकतासँग मात्र जोडेर बुझ्नु गलत हो।
खासगरी आन्दोलनमा राज्यप्रति बढ्दो असन्तोष, भ्रष्टाचार, बेरोजगारी, अवसरको अभाव र राजनीतिक नेतृत्वप्रतिको अविश्वास अभिव्यक्त भएको थियो।
सिग्देलले आन्दोलनको समयमा को-को नेता कहाँ उभिए, कसले संवादको पहल गरे र कसले बल प्रयोगलाई प्राथमिकता दिए भन्ने कुराको मूल्याङ्कन भविष्यमा हुने दाबी गरेका छन्।
उनले भनेका छन्, “त्यो कठिन समयमा कुन नेताको भूमिका के कस्तो थियो, त्यसको आगामी दिनमा पाई-पाई हिसाब हुन्छ।”
सिग्देल नेकपा एमाले निकट विद्यार्थी संगठन अनेरास्ववियु सुनसरीका पूर्व अध्यक्षसमेत हुन्। तर पछिल्लो समय उनी पार्टी नेतृत्वप्रति आलोचनात्मक देखिँदै आएका छन्।
उनले एमाले नेतृत्वले जेनजी आन्दोलनको मर्म, युवाको असन्तोष र नयाँ पुस्ताको राजनीतिक चेतनालाई बुझ्न नसकेको आरोप लगाउँदै आएका छन्।
पछिल्लो समय जेनजी आन्दोलनका क्रममा भएका मृत्यु, आगजनी र सार्वजनिक सम्पत्तिको क्षतिबारे सत्य, तथ्य छानबिन र राजनीतिक जिम्मेवारी तोक्नुपर्ने माग विभिन्न कोणबाटसमेत उठ्दै आएको छ।
गत भदौ २३ र २४ गते भएको जेनजी आन्दोलनमा कोशी प्रदेशका विभिन्न जिल्लाका सरकारी कार्यालय, स्थानीय तहका संरचना, सवारीसाधन र अन्य सार्वजनिक सम्पत्तिमा आगजनी तथा तोडफोडका घटना भएका थिए।
केही स्थानमा सुरक्षाकर्मी र आन्दोलनकारीबीच झडपसमेत भएको थियो भने इटहरीमा प्रहरीको गोली लागेर दुई जना सर्वसाधारणको ज्यानसमेत गएको थियो।
Discussion about this post