ओखलढुङ्गा : ओखलढुङ्गाको चिशंखुगढी गाउँपालिका–६ बोहोरेमा गत माघ १२ गते राति भएको वृद्ध दम्पत्तीको जघन्य हत्या घटनामा संलग्न दुई जना प्रतिवादीलाई प्रहरीले पक्राउ गरेको छ।
लुटपाट गर्ने योजनासहित काठमाडौंबाट ओखलढुङ्गा पुगेका उनीहरूले ८१ वर्षीय चन्द्र विक्रम राई र उनकी ८० वर्षीया श्रीमती चन्द्रमाया राईको हत्या गरेको प्रारम्भिक अनुसन्धानबाट खुलेको छ।
प्रहरीका अनुसार चन्द्र विक्रम आफ्नै घरको दोस्रो तलास्थित सुत्ने कोठाको खाटमा सिरक ओढी मृत अवस्थामा फेला परेका थिए भने उनकी श्रीमती चन्द्रमाया खाट छेउको भुइँमा सिरक ओढिएको अवस्थामा मृत भेटिएकी थिइन्।
माघ १३ गते बिहान ७ः४० बजेतिर स्थानीयले प्रहरीलाई घटनाबारे जानकारी गराएपछि हत्या सार्वजनिक भएको हो।
घटनाको गम्भीरता हेरेर कोशी प्रदेश प्रहरी कार्यालय र जिल्ला प्रहरी कार्यालय ओखलढुङ्गाबाट संयुक्त अनुसन्धान टोली खटाइएको थियो। थप प्राविधिक अनुसन्धान आवश्यक परेपछि केन्द्रीय अनुसन्धान ब्यूरोबाट समेत विज्ञ जनशक्ति परिचालन गरिएको प्रहरीले जनाएको छ।
अनुसन्धानका क्रममा प्रहरीले ३४ वर्षीय धनबहादुर राना मगर र एक १७ वर्षीय बालकलाई पक्राउ गरेको हो। उनीहरूलाई माघ २३ गते काठमाडौं महानगरपालिका–१५, डल्लुस्थित डेराकोठाबाट पक्राउ गरिएको प्रहरीले जनाएको छ। पक्राउ परेका धनबहादुर ओखलढुङ्गाकै चिशंखुगढी गाउँपालिका–६ का स्थायी बासिन्दा हुन्।
प्रहरी अनुसन्धान अनुसार प्रतिवादीहरूले काठमाडौंमै लुटपाट गर्ने योजना बनाएका थिए। गाउँमा चिनिने डरले रातको समयमा वृद्ध दम्पत्तीको घरमा प्रवेश गरी हत्या तथा लुटपाट गरेका उनीहरू घटनापछि फरक बाटो प्रयोग गरी राति नै गाउँ छाडेर फरार भएका थिए।
भाग्ने क्रममा बस टिकट काट्दा समेत वास्तविक नाम लुकाई फरक नाम प्रयोग गरेको खुलेको छ। घटनास्थलबाट प्रहरीले हत्या गर्न प्रयोग गरिएको कोदालो बरामद गरेको छ।
यस्तै, प्रतिवादीहरूको कोठाबाट मृतकहरूले प्रयोग गर्ने मोबाइल, घटनामा प्रयोग भएका मोबाइल, लुटिएको नगद, सुनका गहना, सिक्री, सिम माला लगायतका सामग्री बरामद गरिएको छ।
काभ्रेपलाञ्चोकको पनौतीस्थित आफन्तको डेराबाट मृतक चन्द्र विक्रम राईको मोबाइल समेत बरामद गरिएको प्रहरीले जनाएको छ।
बरामद नगदमा विभिन्न दरका नेपाली नोटहरू रहेका छन्।
पक्राउ परेका दुवै प्रतिवादीलाई बरामद प्रमाणसहित थप अनुसन्धान तथा कानुनी कारबाहीका लागि जिल्ला प्रहरी कार्यालय ओखलढुङ्गा पठाइएको छ।
घटनाबारे विस्तृत अनुसन्धान जारी रहेको र थप तथ्यहरू खुल्ने प्रहरीले जनाएको छ।
Discussion about this post