इटहरी : सुनसरीको कोशी गाउँपालिका ८ भण्टाबारीमा सवारी दुर्घटना हुँदा तीनजनाको मृत्यु भएको छ ।
पूर्व क्षेत्रीय ट्राफिक प्रहरी कार्यालय इटहरीका प्रवक्ता प्रहरी नायब उपरीक्षक (डीएसपी) सुमन तिम्सिनाका अनुसार आज (आइतबार) बिहान ७ः४५ बजे भएको दुर्घटनामा तीनजनाको मृत्यु भएको छ ।
उनका अनुसार पूर्वबाट पश्चिमतर्फ गइरहेको बा ३ ख ७२२४ नम्बरको हायसले पश्चिमबाट पूर्वतर्फ आउँदै गरेको स १ च ४६६१ नम्बरको मोटरसाइकललाई ठक्कर दिएको थियो ।
मोटरसाइकललाई ठक्कर दिएसँगै पश्चिमबाटै पूर्वतर्फ आउँदै गरेको बा ३ ख ९६३८ नम्बरको पिकअप भ्यानलाई ठक्कर दिदाँ तीनजनाको मृत्यु भएको तिम्सिनाले टाकुरालाई जानकारी दिए ।
मृत्यु हुनेमा पिकअप चालक मोरङ विराटनगर ७ निवासी अन्दाजी ३५ वर्षीय अक्षयकुमार गुप्ता रहेका छन् । त्यस्तै, मोटरसाइकलमा सवार मोरङ विराटनगर ९ का रामप्रसाद साहको मृत्यु भएको हो भने मोटरसाइकल चालक सप्तरी डाकेश्वरी ५ बस्ने २८ वर्षीय उदयत साह रहेका छन् ।
उनीहरु तीनैजनाको जिल्ला अस्पताल इनरुवामा उपचारको क्रममा मृत्यु भएको पूर्व क्षेत्रीय ट्राफिक प्रहरी कार्यालय इटहरीले जनाएको छ ।
यस्तै, दुर्घटनामा दुईजना घाइते भएका छन् । घाइते हुनेमा हायस चालक नुवाकोट विदुर नगरपालिका १३ का ३५ वर्षीय विवश तामाङ र हायसमा सवार विदुर नगरपालिका नुवाकोटकै २५ वर्षीय नारायण बत्स्याल रहेका छन् । उनीहरुको जिल्ला अस्पताल इनरुवामा उपचार भइरहेको प्रहरीले जनाएको छ ।
घटनाबारे थप अनुसन्धान भइरहेको छ भने सबै सवारी साधन प्रहरीको नियन्त्रणमा रहेको छ ।
Discussion about this post