इटहरी : नेपाल विद्युत् प्राधिकरण इटहरी वितरण केन्द्रले इटहरीका विभिन्न क्षेत्रमा आइतबार ६ घण्टा विद्युत् आपूर्ति बन्द गर्ने भएको छ।
प्राधिकरणका अनुसार खनार सबस्टेसनबाट प्रसारित ११ केभी खनार फिडरमा अत्यधिक लोडका कारण जम्पर चुँडिने तथा भोल्टेज ड्रप हुने समस्या समाधान गर्न नयाँ ११ केभी फिडर निर्माण तथा चार्ज गर्ने र ३३ केभी ट्रान्सफर्मर प्यानल परिवर्तन गर्न विद्युत् आपूर्ति बन्द गर्न लागिएको हो।
आइतबार बिहान ९ बजेदेखि दिउँसो ३ बजेसम्म विभिन्न क्षेत्रमा विद्युत् अवरुद्ध हुने प्राधिकरणले जनाएको छ। तोकिएको समयभन्दा अगावै काम सम्पन्न भए विद्युत् आपूर्ति पनि सोहीअनुसार चाँडै सञ्चालनमा आउन सक्ने जनाइएको छ।
प्राधिकरणका अनुसार खनार फिडरअन्तर्गत खनार क्षेत्र, नयाँ यातायात, कर कार्यालय, साथी फ्युल पम्प, अख्तियार कार्यालय, जुट विकास, भेटघाट चोक उत्तर, पान्धारे, खानेपानी कार्यालय, पशुपति, डम्फु चोक हुँदै आर्मी ब्यारेकसम्म विद्युत् अवरुद्ध हुनेछ।
त्यस्तै, एनटीसी फिडरअन्तर्गत ट्रान्सपोर्ट, चार्जिङ स्टेसन, साथी पम्प अगाडि, नबिल बैंक क्षेत्र, गोल्डेन चोक, दीपेन्द्र चोक, बीपी चोक, इटहरी मेडिकल, एनटीसी कार्यालय, जनता बस्ती, सिमरबना कव्यबाटिका र हलगडा चोक पश्चिम क्षेत्रमा पनि विद्युत् आपूर्ति बन्द हुनेछ।
गैसार फिडरअन्तर्गत खनार सवस्टेसन पश्चिम, मिया टोली, ओशो चोक, पुष्पलाल चोक, पूर्वी गैसार, हाउजिङ, सेतो गुराँस, फूलबारी टोल, विद्युत् कार्यालय, बसपार्क, कलंकी चोक, राजस्व ढाँट, पच्चुकी, बालग्राम हुँदै भाटभटेनी र बज्राह क्षेत्रमा विद्युत् अवरुद्ध हुने प्राधिकरणले जनाएको छ।
यसैगरी नयाँ झुम्का फिडरअन्तर्गत झुम्का पूर्व–उत्तर क्षेत्रदेखि सिप्रदीसम्म तथा पुरानो उद्योग फिडरअन्तर्गत रिलायन्स अगाडिदेखि दक्षिण खनार काली मन्दिरसम्मका उद्योगहरूमा समेत विद्युत् आपूर्ति बन्द हुनेछ।
प्राधिकरणले विद्युत् अवरुद्ध हुने क्षेत्रका ग्राहकलाई आवश्यक तयारी गर्न आग्रह गरेको छ।
Discussion about this post