मोरङको बलियामा डरलाग्दो बलात्कारको घटना, महिलाको यौनाङ्ग क्षतिविक्षत, अवस्था गम्भीर

इटहरी (डेस्क) : मोरङको बलियामा तीनजनाको समूहद्वारा एक महिला बलात्कारको सिकार भएकी छन् । बेलबारी नगरपालिका ४ की ३० वर्षीया महिला सुन्दरहरैँचा नगरपालिका ४ बलियामा शुक्रबार राति बलात्कारको सिकार भएकी हुन् ।

मोरङ प्रहरीका प्रवक्ता डीएपसी मञ्जिल मुकारुङका अनुसार बलियामा रहेको श्रेष्ठ होटल एन्ड फेमिली लजको एउटा कोठामा बन्धक बनाएर महिलामाथि तीन जनाले शुक्रबार राति सामूहिक बलात्कार गरेका हुन् ।

मुकारुङका अनुसार होटल सञ्चालक सुन्दरहरैँचा ४ का ३६ वर्षीय अर्जुन श्रेष्ठ, उनका भाइ २७ वर्षीय मनोज श्रेष्ठ र झापा घर बताउने रामबहादुर नेपालीले होटलमा राखेर रातभर सामूहिक बलात्कार गरेको प्रहरीको प्रारम्भिक अनुसन्धानबाट खुलेको छ । बलात्कारपछि अत्यधिक रक्तश्राव भएका कारण महिलाको अवस्था गम्भीर रहेको प्रहरीले जनाएको छ ।

प्रहरीका अनुसार अत्यधिक रक्तश्राव भएकी महिलाको यौनाङ्ग क्षतिविक्षत हुनुका साथै शरीरभरि नीलडाम र चोटपटक छ ।

उपचारमा संलग्न प्रसूति तथा स्त्री रोग विशेषज्ञ डा. रिभा केसीले अत्यधिक रक्तश्रावका कारण महिलाको स्वास्थ्य अवस्था जटिल बनेको बताइन् । ‘अवस्था अन्तिम बनिसकेपछि मात्रै उपचारका लागि ल्याइएको रहेछ,’ उनले भनिन्, ‘अस्पताल ल्याउन केही ढिला भएको पाइयो ।’

डा. केसीका अनुसार पीडित महिलाको यौनाङ्ग क्षतिविक्षत छ । शरीरका विभिन्न भागमा चोटपटक छ ।

यसरी भयो घटना

पारिवारिक आर्थिक अवस्था कमजोर भएकी महिलाले शुक्रबारदेखि नै सुनसरीको इटहरीस्थित एउटा घरमा काम गर्न थालेकी थिइन् । काम सकेर सुन्दरहरैँचाकै गछियास्थित बहिनीको घरमा फर्कदै गरेको अवस्थामा उनलाई बलात्कारमा संलग्नमध्ये रामबहादुरले शुक्रबार साँझ ६ बजेतिर गाडीमा राखेर गछियाबाट लगेको प्रहरीले जनाएको छ ।

प्रहरीका अनुसार इटहरीबाट गाडीमा आएर गछियामा ओर्लिएपछि उनले बहिनीको घरको लोकेसन अर्को गाडीमा रहेका रामबहादुरलाई सोधिन् । बहिनीको घर पुर्याइदिन्छु भन्दै गाडीमा राखेर होटलमा लगेको पाइएको डिएसपी मुकारुङले जानकारी दिए । घटनापछि रामबहादुर फरार छन् । प्रहरीले उनको नाम रामबहादुर नेपाली हो कि हैन भनेर यकिन हुन भने बाँकी रहेको जनाएको छ ।

उनीसँगै बलात्कारमा संलग्न मनोज पनि फरार थिए । उनलाई भने शनिबार साँझ पक्राउ गरिसकेको प्रहरीले जनाएको छ ।

बलात्कार पीडित महिलालाई उपचारका लागि कोसी अस्पताल लिएर आएका होटल सञ्चालक अर्जुनलाई प्रहरीले शनिबार दिउँसो विराटनगरबाटै पक्राउ गरेको थियो ।

उनले महिलालाई प्रदेश २–०१–००१ च २२७ नम्बरको गाडीमा राखेर उपचारका लागि कोसी अस्पताल ल्याएका थिए । महिलालाई शुक्रबार साँझ गछिया पुलबाट त्यही गाडीमा राखेर रामबहादुरले होटलसम्म लगेको पाइएको प्रहरीले जनाएको छ ।

बलात्कार गर्न नदिएर महिलाले प्रतिकार गरेपछि अर्जुनले हात भित्र लगेर महिलाको यौनाङ्ग नै क्षतिविक्षत बनाइदिएको प्रहरीको प्रारम्भिक अनुसन्धानबाट खुलेको छ ।

प्रहरीका अनुसार अत्यधिक रक्तश्राव भएकी महिलाको यौनाङ्ग क्षतिविक्षत हुनुका साथै शरीरभरि नीलडाम र चोटपटक छ । प्रतिकार गर्न थालेपछि महिलालाई यातना दिने र कुटपिट गर्ने काम समेत भएको डीएसपी मुकारुङले बताए । पक्राउ परेकामाथि गम्भीर अुनसन्धान सुरु गरिएको उनले बताए ।

 

कोसी अनलाइनको सहयोगमा ।