इटहरी : आफ्नै बाबुलाई फलामको मुस्लो प्रहार गरेर हत्या गर्ने छोरालाई प्रहरीले पक्राउ गरेको छ ।
हत्या गरी फरार रहेका २४ वर्षीय टंकबहादुर भण्डारीलाई प्रहरीले पक्राउ गरेको हो ।
उनले मंगलबार बिहान आफ्नै बाबु ५३ वर्षीय भक्तबहादुर भण्डारीलाई घरायसी विवाद हुदाँ धान कुट्ने फलामको मुस्लोले टाउकोमा प्रहार गरेका थिए । घाइते भएका भक्तबहादुरको छथर अस्पताल शुक्रवारेमा उपचारको क्रममा मृत्यु भएको थियो ।
घटनापश्चात फरार रहेका प्रतिवादी टंकबहादुर भण्डारीलाई जिल्लाहरूमा जान सक्ने नाकाहरूमा जिल्ला प्रहरी कार्यालय तेह्रथुम, इलाका प्रहरी कार्यालय बसन्तपुर लगायत मातहत प्रहरी कार्यालयहरूबाट प्रहरी परिचालन गरि खोजतलास गर्ने क्रममा तेह्रथुम म्याङलुङ नगरपालिका पिङ्गुवा खोलाको पुल आसपास पक्राउ गरिएको हो ।
पक्राउ परेका उनलाई मुलुकी अपराध संहिता, २०७४ अनुसार ज्यान सम्बन्धी कसुरमा तेह्रथुम जिल्ला अदालतबाट म्याद थप गरी अनुसन्धान भइरहेको जिल्ला प्रहरी कार्यालय तेह्रथुमले जनाएको छ ।
Discussion about this post