मोरङ : मोरङको बूढीगंगास्थित नरग्राम माविमा कक्षा ११ मा अध्ययन गर्दै आएका एञ्जल सुवेदी स्कूल प्राङ्गणभित्रै रहेको अमलाको रुखबाट लडेर घाइते भए ।
१८ वर्षीय सुवेदी रुखबाट लडेपछि सिकिस्त घाइते भए । उनको अहिले विराट टिचिङ हस्पिटलमा उपचार भइरहेको छ । अस्पताल पुर्याएपछि परिवारलाई खबर भयो । खबर पाएपछि परिवार भने विक्षिप्त बने ।
उनको घाँटी, हात, खुट्टा, करङ भाँचिएपछि अहिले आइसियुमा राखेर उपचार भइरहेको छ ।
‘विद्यालय गएको भाइ अचानक अस्पतालमा पुर्याएपछि खबर आउँदा निःशब्द भयौँ,’ बिरामीकी दिदी एल्जिना सुवेदीले भनिन्, ‘सबै उपचार गर्नका लागि १० लाखभन्दा बढी रकम लाग्नेरहेछ, अहिले औषधि किन्ने पैसा पनि सकिएको छ ।’
उनले उपचारका लागि खर्च निकै लाग्ने भएपनि आफूहरूसँग भएको सबै पैसा सकिएको बताइन् ।
‘घाँटीको अप्रेसन गरिएको छ, एक लाख ६० हजार लाग्यो, विद्यालयले ५० हजार रुपैयाँ दियो,’ उनले भनिन्, ‘हात, खुट्टाको उपचार गर्न बाँकी नै छ ।’ आफू सहकारीमा काम गरेर मासिक सात हजार कमाउने गरेको र परिवारको अरु आयस्रोत समेत नहुँदा समस्या भएको उनी बताउँछिन् ।
बिरामीकी आमा जानुका सुवेदीले आफू अहिले ज्यालादारीमा काम गर्दै आएको र उपचारका लागि निकै समस्या भएको बताइन् ।
‘छरछिमेक र गाउँघरबाट अलिअलि उठाएर तिर्यौ, अहिले दैनिक रूपमा उपचार गर्नका लागि पैसा चाहिएको छ,’ उनले भनिन्, ‘अप्रेसन गर्न नै तीन लाखभन्दा बढी लाग्छ रे, औषधिकै एक लाखभन्दा बढी उधारो भइसक्यो ।’
आफ्ना श्रीमान लकडाउनदेखि काठमाडौं बसेको र सम्पर्कमै नआएको उनको भनाइ छ । ‘श्रीमान् पनि नहुँदा आफूले ज्यालादारीमा काम गरेर छाक जुटाउँदै आएकी थिएँ’ उनले भनिन्, ‘क्याम्पस गएको छोरा सिकिस्त घाइते भएर हल न चल भएको छ, बिजोग भयो ।’
प्रिमियर वायरमा काम गर्दै आएकी उनले छोराको उपचारका लागि सहयोगको याचना गरिन् ।
ज्यालादारीका काम गर्ने भएकाले काम गर्न गएमात्र पैसा आउने उनले बताइन् । ‘ज्यालादारी भएका कारण काम गर्न गएको दिनमात्रै पैसा आउँछ,’ उनले भनिन्, ‘अहिले हस्पिटलमै बस्नुपरेकाले काम गर्न जान पाइएको छैन, घरखर्च टार्न समेत धौधौ छ ।’
उदयपुरको बेलका नगरपालिका ५ घर भएका उनीहरू आठ वर्षयता मोरङको बुढीगंगा गाउँपालिका ३ स्थित गैरीटोलमा कोठाभाडामा बस्दै आएका छन् ।
छोराछोरीलाई पढाउनकै लागि यहाँ आएको भएपनि अहिले पढाइकै क्रममा रुखबाट लडेर अवस्था गम्भीर भएपछि उनी अताल्लिएकी छन् ।
विराट टिचिङ हस्पिटलमा अहिले डा। सतिस दासले उनको उपचार गरिरहेका छन् । यसअघि सामाजिक सञ्जाल फेसबुकमा सहयोगको याचना गरेकाले केही पैसा उठेपनि अझै अपुग रहेको पीडित परिवारको गुनासो छ ।
यता, नरग्राम माविका प्रधनाध्यापक नरेन्द्र राईले आफूहरूले शिक्षकबाटै उठाएर केही रकम सहयोग गरेको बताए ।
‘बिहानको समयमा कक्षा थियो, त्यसैबेला अमलाको रुखबाट लडेर घाइते भएछन्’ राईले भने, ‘हामीले हस्पिटलसम्म पुर्यायौँ, पहिलो दिनको औषधि खर्च पनि तिरेका थियौँ, स्कूलबाट सहयोग गर्ने कुनै स्रोत नहुँदा पनि समस्या भएको छ ।’
उनका अनुसार मेहनती विद्यार्थीको रूपमा चिनिएका सुवेदी विद्यालयमा राम्रो अंक ल्याएर उत्तीर्ण हुँदै आएका थिए । उपचारका लागि हस्पिटलले पनि केही रकम छुट गरिदिए राहत हुने उनले बताए ।
सहयोगको याचना
आर्थिक अवस्था कमजोर रहेको पीडित परिवारले सहयोगको याचना गरेको छ । अहिले कतिपय सहयोगीहरूले उपचारका लागि भनेर रकम पनि सहयोग गर्दै आएका छन् ।
एनएमबी बैँकमा एल्जना सुवेदीको नाममा रहेको २१०१९६०२७०००१७ नम्बरको खातामा सहयोग गर्न सकिने छ । यस्तै, पीडित परिवारले ९०७७५६५७३ नम्बरमा फोन सम्पर्क गरेर समेत सहयोग गर्न सकिने बताएका छन् ।
Discussion about this post