मोरङ : मोरङ जिल्लाका विभिन्न स्थानमा भएका सवारी दुर्घटनामा आइतबार तीन जनाको मृत्यु भएको छ । मृतक तीनै जना पुरुष हुन् ।
सुन्दरहरैँचा नगरपालिका–६ गैरीगाउँस्थित भित्री सडकखण्डमा आइतबार बिहान ट्याक्टर दुर्घटना हुँदा एक जनाको मृत्यु भएको छ ।
लाइटिङ बोर्डिङ स्कुलबाट गछिया खोलातर्फ जाँदै गरेको को १ त ६४५८ नम्बरको ट्याक्टर बिहान करिब ५ः४५ बजे आफैं अनियन्त्रित भई दुर्घटना हुँदा सहचालक सुन्दरहरैँचा–६ का २६ वर्षीय अतीत राई गम्भीर घाइते भएका थिए ।
घाइते राईको उपचारका क्रममा बिहान ७ः१५ बजे विराटनगरस्थित नोबेल शिक्षण अस्पतालमा मृत्यु भएको मोरङ ट्राफिक प्रहरी कार्यालयले जनाएको छ ।
ट्याक्टर चालक सुन्दरहरैँचा–६ का ४० वर्षीय प्रेमकुमार राईलाई प्रहरीले नियन्त्रणमा लिएको छ ।
त्यस्तै, ग्रामथान गाउँपालिका–२ झोराहाटमा मोटरसाइकलको ठक्करबाट पैदलयात्रीको मृत्यु भएको छ ।
शनिबार साँझ ७ः३५ बजे विराटनगरबाट विराटचोकतर्फ जाँदै गरेको प्रदेश १–०२–०४५ प ३१४१ नम्बरको मोटरसाइकलले पैदलयात्री ग्रामथान–२ का ५२ वर्षीय सुरेशकुमार सरदारलाई ठक्कर दिएको थियो ।
गम्भीर घाइते भएका सरदारलाई उपचारका लागि विराटनगरस्थित विराट नर्सिङ होम पुर्याउनासाथ चिकित्सकले मृत घोषणा गरेका थिए ।
दुर्घटनामा मोटरसाइकलको पछाडि सवार ग्रामथान–२ की १७ वर्षीया जिया तिगा घाइते भएकी छन् । उनको सोही अस्पतालमा उपचार भइरहेको छ । मोटरसाइकल चालक ग्रामथान–२ का १८ वर्षीय इशान पौडेललाई प्रहरीले नियन्त्रणमा लिएको छ ।
यसैबीच, धनपालथान गाउँपालिका–४ मा मोटरसाइकलको ठक्करबाट घाइते भएका एक पुरुषको उपचारका क्रममा दुई सातापछि मृत्यु भएको छ ।
गत मंसिर १२ गते साँझ सखरदिनाबाट कर्सियातर्फ जाँदै गरेको को २३ प ८४०६ नम्बरको मोटरसाइकलले पैदलयात्री धनपालथान–३ सोराभागका ५२ वर्षीय शिवचरण माझीलाई ठक्कर दिएको थियो ।
गम्भीर घाइते माझीको उपचारका क्रममा आइतबार (आज) बिहान ३ः१५ बजे नोबेल शिक्षण अस्पतालमा मृत्यु भएको प्रहरीले जनाएको छ ।
मोटरसाइकल चालक धनपालथान–४ का ३१ वर्षीय धर्मेन्द्र परियारलाई नियन्त्रणमा लिएर घटनाको अनुसन्धान भइरहेको प्रहरीले जनाएको छ ।
Discussion about this post