इटहरी : सुनसरीको बराहक्षेत्र नगरपालिका–११ गुप्ता टोलस्थित भित्री सडक खण्डमा मोटरसाइकल दुर्घटना हुँदा एक जनाको मृत्यु भएको छ भने अर्का एक जना गम्भीर घाइते भएका छन्।
को २५ प १४९ नम्बरको मोटरसाइकल सडकको पक्की कल्भर्टमा ठोक्किँदा ठूलो आवाज आएपछि स्थानीयले प्रहरी चौकी मधुवनमा खबर गरेका थिए।
खबर प्राप्त हुनासाथ प्रहरी नायब निरीक्षक दिलबहादुर लिम्बुको कमाण्डमा दुई जनाको टोली घटनास्थलमा खटिएको थियो।
प्रहरीका अनुसार मोटरसाइकल कल्भर्टभन्दा करिब तीन मिटर पूर्व–उत्तर साइडको खाल्टोमा लडेको अवस्थामा फेला परेको थियो। चालक सुनसरीको दुहबी नगरपालिका–५ बस्ने करिब ३२ वर्षीय विजय ऋषिदेव टाउकोमा गम्भीर चोट लागेर घटनास्थलमै घोप्टो परेका अवस्थामा भेटिएका थिए।
मोटरसाइकल पछाडि सवार सोही स्थानका करिब ३० वर्षीय दीपेन ऋषिदेव पनि टाउको र अनुहारमा चोट लागेको अवस्थामा खाल्टोमै भेटिएका थिए।
दुवै घाइतेलाई तत्काल उपचारका लागि सप्तकोशी न्यूरो अस्पताल, भोक्राहा नरसिंह, सुनसरी पठाइएको थियो। चिकित्सकले जाँच गर्दा चालक विजय ऋषिदेवलाई आज (बिहीवार)बिहानको राति २ः०५ बजे मृत घोषणा गरेको प्रहरीले जनाएको छ। उनको शव सोही अस्पतालमा राखिएको छ।
पछाडि सवार दीपेन ऋषिदेवको उपचार भइरहेको छ।
दुर्घटनाग्रस्त मोटरसाइकल प्रहरी चौकी मधुवनको नियन्त्रणमा रहेको छ। घटनास्थल ट्राफिक प्रहरी पोस्ट चक्रघट्टीबाट करिब ७ किलोमिटर दक्षिणमा पर्दछ।
कागजपत्र तथा मापसे परीक्षणबारे विवरण खुल्न बाँकी रहेको र प्रारम्भिक अनुसन्धानमा तीव्र गतिका कारण चालकले सडकमा ध्यान नदिँदा दुर्घटना भएको आशंका गरिएको प्रहरीले जनाएको छ।
Discussion about this post