इटहरी : सुनसरी प्रहरीले विभिन्न मुद्दामा अदालतबाट दोषी ठहर भई फरार रहेका आठ जना प्रतिवादीलाई पक्राउ गरेको छ।
जिल्ला प्रहरी कार्यालय सुनसरी तथा मातहत प्रहरी इकाइबाट खटिएको टोलीले विशेष अभियान सञ्चालन गरी जिल्ला अदालतको फैसला कार्यान्वयनका क्रममा उनीहरूलाई पक्राउ गरेको हो।
पक्राउ पर्नेमा कोशी गाउँपालिका–७ का शिवनारायण मोची, इनरुवा नगरपालिका–६ की सिता श्रेष्ठ, झापाको गौरादह नगरपालिका–५ का मोहन श्रेष्ठ, धरान उपमहानगरपालिका–१५ का बब्लु भनिने मणी परियार र विक्रम विक, बराहक्षेत्र नगरपालिका–७ का मंगल लिम्बू, दुहवी नगरपालिका–१२ का जयनारायण चौधरी तथा गढी गाउँपालिका–३ का अशोक प्रसाद साह हलुवाई रहेका छन्।
मोची भने कुटपिट तथा अंश भरपाइ बदर गरी दुई मुद्दामा फरार रहेका थिए। उनीबाट कुल १४ हजार ४६७ रुपैयाँ जरिवाना असुल गर्न बाँकी रहेको प्रहरीले जनाएको छ।
पक्राउ परेकामध्ये कर्तव्य ज्यान मुद्दाका मणी परियार र विक्रम विकलाई दुई–दुई वर्ष कैद सजाय बाँकी रहेको छ भने लागूऔषध मुद्दाका मंगल लिम्बूलाई ४५ दिन कैद र दुई हजार रुपैयाँ जरिवाना बाँकी रहेको छ।
अन्य प्रतिवादीहरू कुटपिट, चेक अनादर तथा अंश भरपाइ बदर मुद्दामा फरार रहेका थिए। पक्राउ परेका सबैलाई फैसला कार्यान्वयनका लागि सुनसरी जिल्ला अदालतमा उपस्थित गराइएको जिल्ला प्रहरी कार्यालय सुनसरीले जनाएको छ।
Discussion about this post