इटहरी : पछिल्लो समय महिला फुटबलप्रतिको आकर्षण बढ्दै गइरहेका बेला इटहरीले पनि आफूलाई महिला फुटबलको महत्वपूर्ण गन्तव्यका रूपमा स्थापित गर्ने प्रयास थालेको छ।
यही अभियानअन्तर्गत इटहरी रंगशालामा असार १३ गतेदेखि २० गतेसम्म कोशी प्रदेशस्तरीय महिला फुटबल प्रतियोगिता आयोजना गरिने भएको छ।
इटहरी फुटबल क्लबको आयोजनामा हुने प्रतियोगितामा राष्ट्रिय स्तरका आठ टोलीले प्रतिस्पर्धा गर्नेछन्। आयोजकका अनुसार प्रतियोगिताले महिला खेलाडीलाई प्रतिस्पर्धात्मक अवसर उपलब्ध गराउनुका साथै प्रदेशमा महिला फुटबलको विकासमा टेवा पुग्ने अपेक्षा गरिएको छ।
प्रतियोगिताको विजेता टोलीले दुई लाख रुपैयाँ तथा उपविजेताले एक लाख रुपैयाँ नगद पुरस्कार प्राप्त गर्नेछन्। उत्कृष्ट खेलाडीलाई २५ हजार रुपैयाँसहित सम्मान गरिने व्यवस्था गरिएको छ।
हरेक दिन दिउँसो ४ः३० बजे सुरु हुने खेलले स्थानीय खेलप्रेमीलाई निरन्तर एक सातासम्म उच्चस्तरीय महिला फुटबल हेर्ने अवसर प्रदान गर्ने आयोजकको विश्वास छ।
कोशी प्रदेश फुटबल संघको सहयोग तथा कोशी प्रदेश खेलकुद विकास बोर्डको संयोजनमा आयोजना हुने प्रतियोगिताले प्रदेशभित्रका प्रतिभावान महिला खेलाडीलाई राष्ट्रिय मञ्चसम्म पुग्ने अवसर सिर्जना गर्ने अपेक्षा गरिएको छ।
आयोजकले महिला फुटबलप्रतिको बढ्दो लोकप्रियतालाई थप ऊर्जा दिन र इटहरीलाई नियमित राष्ट्रियस्तरका खेलकुद गतिविधिको केन्द्रका रूपमा विकास गर्ने उद्देश्यले प्रतियोगिता आयोजना गरिएको जनाएको छ।
Discussion about this post