इटहरी : बैशाख ३० गते हुने स्थानीय तहको निर्वाचनमा इटहरी उपमहानगरपालिका वडा नं. ४ मा विक्रमबाबु थापा नेपाली कांग्रेसबाट वडाध्यक्षका उम्मेदवार छन् ।
उनी अहिले घरदैलो अभियानमा रहँदा आम मानिसको आशीर्वाद सँगै साथ पाएकाले चुनाव जित्ने विश्वासमा छन् ।
भन्छन्, ‘विभिन्न संस्थामा रहेर सकारात्मक काम गरेकै कारण आज पार्टीले पत्याएर वडाध्यक्षमा टिकट दिएको छ, आम मानिसहरूको साथ पाएका कारण चुनाव जित्नेमा ढुक्क छु ।’ उनले पाँच वर्षसम्म इटहरीमा नेकपा एमालेले नेतृत्व गरेपनि सकारात्मक काम नभएको आरोप लगाए ।
आफूले चुनाव जितेको अवस्थामा भेदभावरहित तरिकाले समान रूपमा सेवा प्रदान गर्ने उनको भनाइ छ ।
उनले भने, ‘यहाँ एउटा पार्टीबाट चुनाव जितेर गएकाहरू अर्को पार्टीका मानिसको सिफारिससम्म नगर्ने परम्परा छ, अब हामीले चुनाव जितिसकेपछि भेदभावरहित रूपमा सेवा प्रदान गर्नेछौँ ।’
उनले आफूले विभिन्न संस्थामा रहेर काम गरेको अनुभव भएका कारण सक्षम युवा नेतृत्वको आवश्यक रहेको बताए । थापाले युवा नेतृत्व धेरै ठाउँ रहेपनि सक्षम युवा नेतृत्व नभएका कारण यसपटक इटहरी ४ मा आफ्नो नेतृत्वमा विकासका काम द्रूत गतिमा अगाडि बढ्ने दाबी गरे ।
‘यहाँ सबैभन्दा ठूलो समस्या बाढीको छ, यसको दीर्घकालीन निकास दिनका लागि मेरो मुख्य प्राथमिकता रहन्छ,’ उनले भने, ‘बाटो बनाउने भन्दापनि शिक्षा, स्वास्थ्य जस्ता कुरालाई प्राथमिकतामा राखेर काम गर्नेछौँ ।’
‘विशेषगरी कुलतमा फसेका युवाहरूलाई खेलकुदको माध्यमबाट समाजमा स्थापित गराउनका निम्ति नेतृत्व गरेर काम गर्दै आएको छु,’ उनले भने, ‘व्यवसाय पनि गर्दै आएको छु, कतिपय मानिसहरू राजनीतिलाई व्यवसाय बनाइरहेका बेला मैले राजनीतिलाई सेवाको रूपमा लिएको छु ।’
उनले यसपटक इटहरी ४ मा जनताले परिवर्तन आवश्यक रहेको बुझेका कारण आफूहरूले चुनाव जित्ने दाबी गरे ।
थापाको प्यानलमा नेपाली कांग्रेसबाट खुल्ला महिला सदस्यमा शान्ताकुमारी न्यौपाने, सुष्मा बर्देवा (सुकसरी), खुल्ला सदस्यमा रोशन कुमार तामाङ र खुल्ला सदस्यमा माओवादी केन्द्रका चहकमान भन्डारी उम्मेदवार छन् ।
यस्तो छ थापाको पृष्ठभूमि
२०४३ भदौ १७ गते खोटाङको दोर्पामा जन्मिएका उनी ०५२ सालमा इटहरी आएपछि अध्ययनकै क्रममा विद्यार्थी राजनीतिबाट सक्रिय राजनीतिमा होमिएका हुन् ।
कक्षा सातमै अध्ययन गर्ने क्रममा नेविसंघको इकाई सभापति भएका उनमा विस्तारै राजनीतिक मोह बढ्दै गयो । १५ वर्ष अघिदेखि क्रियाशिल सदस्य लिएका उनी हाल कांग्रेस इटहरी ४ का सभापति समेत हुन् । पार्टीमा वडा सदस्य, वडा सचिव हुँदै हाल १४ औँ महाधिवेशनमा उनी सभापतिमा विजयी भएका हुन् ।
यसअघि टोल विकासको अध्यक्ष रहँदा उनले खेल क्षेत्रमा पनि सकारात्मक काम गरेका छन् । ०७२ सालदेखि खेलकुद क्षेत्रमा काम गर्दै आएका उनी हाल भलिबल संघ प्रदेश १ का सदस्य समेत हुन् । अहिले थापाले खेलकुदका गतिविधिलाई प्राथमिकतामा राखेका काम गर्दै आएको बताए ।
‘विशेषगरी कुलतमा फसेका युवाहरूलाई खेलकुदको माध्यमबाट समाजमा स्थापित गराउनका निम्ति नेतृत्व गरेर काम गर्दै आएको छु,’ उनले भने, ‘व्यवसाय पनि गर्दै आएको छु, कतिपय मानिसहरू राजनीतिलाई व्यवसाय बनाइरहेका बेला मैले राजनीतिलाई सेवाको रूपमा लिएको छु ।’
उनले आफूले राजनीतिलाई व्यवसाय भन्दा पनि सेवाको रूपमा लिने भएका कारण पनि यसपटक चुनाव जित्ने बताए ।
स्नातक तह उत्तीर्ण गरेका उनी यहाँका लोकप्रिय युवा नेता हुन् । हरेक वर्ष भलिबल प्रतियोगिता पनि गर्दैै आएका उनले खेलकुद, कला, साहित्य, संगीत जस्ता क्षेत्रमा पनि आफूले सकारात्मक काम गर्ने प्रवितद्वता व्यक्त गरे ।
Discussion about this post