इटहरी : सुनसरी क्षेत्र नं. ३ बाट प्रतिनिधिसभा सदस्य रहेका अशोक चौधरीले प्रधानमन्त्री बालेन्द्र शाह (बालेन)सँग भेट गरी आफ्नो निर्वाचन क्षेत्रका समसामयिक समस्या, विकास निर्माण तथा जनचासोका विषयमा छलफल गरेका छन्।
भेटका क्रममा उनले स्वास्थ्य, शिक्षा, कृषि, पूर्वाधार तथा जनजीवनसँग प्रत्यक्ष सम्बन्धित विभिन्न मुद्दामा प्रधानमन्त्रीको ध्यानाकर्षण गराएका थिए।
छलफलमा इटहरी र दुहबीका नगर अस्पताल तथा गढी र बर्जु गाउँपालिकाका स्वास्थ्य केन्द्रहरूको स्तरोन्नति, विशेषज्ञ चिकित्सक तथा डाक्टरको व्यवस्था गर्नुपर्ने विषय उठाइएको थियो। साथै, दुहबी, बर्जु र गढी क्षेत्रमा देखिएको खानेपानी समस्याको दीर्घकालीन समाधान खोज्नुपर्ने आवश्यकता औंल्याइएको छ।
सामुदायिक विद्यालयको शैक्षिक गुणस्तर सुधार गर्न र विद्यालय व्यवस्थापन समिति गठनमा भइरहेको राजनीतिक हस्तक्षेप अन्त्य गर्नुपर्ने मागसमेत गरिएको चौधरीले जानकारी दिए।
कृषि क्षेत्रतर्फ किसानले भोगिरहेका मल, बीउबिजन र सिँचाइ अभावका समस्या समाधान गर्न तथा उखु किसानका लागि न्यूनतम समर्थन मूल्य र बजार सुनिश्चितता आवश्यक रहेको विषयमा पनि जोड दिइएको उनले बताए।
यस्तै, सुकुम्बासी तथा अव्यवस्थित बसोबासीहरूको दीर्घकालीन व्यवस्थापन, बर्जु तालको संरक्षण र पर्यटन विकासमार्फत आर्थिक सम्भावना वृद्धि गर्ने विषयमा समेत विशेष ध्यानाकर्षण गराइएको उनको भनाइ छ।
त्यसैगरी, श्रम ऐन २०७४ को दफा ३८ (ज) संशोधन गरी श्रमिक हकहित संरक्षण गर्नुपर्ने र केसिलिया खोलाबाट हुने डुबान समस्या समाधानका लागि तटबन्ध निर्माण तथा प्रभावकारी नियन्त्रण योजना आवश्यक रहेको विषय पनि उठाइएको छ।
छलफल सकारात्मक रहेको र उठाइएका विषयहरूमा सरकारको ध्यानाकर्षण भएको बताइएको छ। प्रधानमन्त्री शाहले कोशीबाट निर्वाचित प्रतिनिधिसभा सदस्यहरूसँग आज छलफल गरी समस्या सुनेका थिए।
Discussion about this post