मानसिक यातना दिएर विद्यार्थीसँग शुल्क असुल्दै इटहरीका निजी कलेज

इटहरी : इटहरीका निजी कलेजहरुले विद्यार्थीलाई मानसिक यातना दिएर लकडाउनको समयमा अध्ययन नभएको शुल्क असुल्ने गरेको पाइएको छ । इटहरीका अधिक निजी कलेजहरुले विद्याार्थीलाई विभिन्न बहाना बनाएर मानसिक यातना दिई शुल्क असुल्ने गरेको पाइएको हो ।

इटहरीको विश्व आदर्श कलेजमा कक्षा १२ अध्ययनरत नीमा तामाङले आफूहरुलाई कलेजले मानसिक यातना दिने गरेको बताए ।

‘हामीले जति समय पढ्यौँ त्यति समयको पैसा तिर्ने माग राखेका हौँ, कलेजले मानसिक रुपमा यातना दिएर शुल्क असुल्न लागिपरेको छ ।’ शिक्षकहरुले प्रयोगात्मक परीक्षामा फेल गराइदिने भन्दै अश्लील शब्द प्रयोग गरी धम्की दिने गरेको उनले गुनासो गरे ।

‘प्राक्टिकलको नम्बर काटिदिन्छु भन्दै धम्की दिएर शुल्क असुल्ने गरेको छ,’ उनले टाकुरासँग भने, ‘परिवारलाई पनि फोन गरेर मानसिक रुपमा टचर दिने गरेका छन् ।’

शिक्षकले निजी विद्यालय राजनीति गर्ने थलो नभएको भन्दै सामुदायिक विद्यालयमा अध्ययन गर्न जानका लागि पटक–पटक धम्की दिने गरेको तामाङको गुनासो थियो । ‘तिमीहरु राजनीति गर्ने भए सामुदायिक क्याम्पस जानू, नभए प्रहरीको भ्यान बोलाएर पठाइदिन्छु, यति सम्म भनेर पटक–पटक धम्की दिएका छन् ।’ कलेजले विद्यार्थीहरुलाई यातना दिने गरेकाले अध्ययन गर्न समेत आफूहरु निराश भएको सम्झदैँ भने ।

उनी एक प्रतिनिधि पात्र मात्र हुन् । इटहरीको विश्व आदर्श, कस्तुरी, कोशी, शुष्मा, नमुना लगायत यहाँ रहेका आधा दर्जन बढी निजी कलेजका सयौँ विद्यार्थीहरु उनीजस्तै शोषणमा छन् । कलेजहरुले विभिन्न बहानामा विद्यार्थीहरुसँग यातना दिएर शुल्क असुल्ने गरेको विद्यार्थीहरुको गुनासो छ ।

इटहरीको कस्तुरी कलेजमा कक्षा १२ मा अध्ययनरत निश्चल पौडेल भन्छन्, ‘जम्मा सात महिना पढाई भएको छ, अहिले कलेजले विभिन्न रुपमा मानसिक यातना दिएर १२ महिनाको नै फि मागिरहेको छ ।’ उनका अनुसार कलेजले १२ कक्षाको फर्म भनुर्् अगाडि नै वर्षभरीको सबै पैसा माग्ने गरेकाले आफूहरु समस्यामा रहेको उदृत गरे।

इटहरीको कोशी कलेजकी सुमिना डाँगीले अनलाइनबाट कक्षा सञ्चालन भएको पनि कलेजले शुल्क असुलेको बताईन् ।

‘लकडाउनको समयमा कहिलेकाहीँ अनलाइनबाट पढाई भएको पनि कलेजले रकम मागेको अवस्था छ,’ उनले आफ्नो समस्या सम्झदैँ भनिन्, ‘सबैको घरमा नेट हुँदैन धेरैजसो विद्यार्थीले त अनलाइनबाट पढ्न पनि पाएनन्, तर हामीले मानसिक यातना भोगिरहेका छौँ ।’ उनका अनुसार अनलाइन क्लासको नाममा कलेजले चरम शोषण गरेको बताइन् ।

‘त्यो समयमा अनलाइनबाट कक्षा लिनका लागि भर्ना नगरी हुँदैन भनेर हामीले जबरजस्ती दश हजार रुपैँया तिर्न बाध्य भयौँ,’ उनले भनिन्, ‘१२ कक्षाको फर्म भर्नका लागि अहिले सबै रकम मागिरहेको अवस्था छ ।’

यता, इटहरी उपमहानगरपालिकाका शिक्षा शाखा प्रमुख सूर्यप्रसाद सुवेदीले भने उपमहानगर र कलेज प्रशासनबीच छलफल भएपनि कुनै निर्णय भइनसकेको प्रतिक्रिया दिए । उनले भने, ‘हामीले विभिन्न चरणमा विद्यार्थी र कलेज प्रशासनबीच छलफल गर्नेछौँ, वास्तविकताको नजिक पुगेर उचित निर्णय गर्नेछौँ ।’

उता, हिसान सुनसरीका अध्यक्ष मुकुन्द घिमिरेले भने सुनसरीको मात्रै नभई यो समस्या राष्ट्रिय मुद्धा रहेकाले सरकारबाटै निर्णय आएमा मात्रै समस्याको निराकारण हुने बताए । उनले टाकुरासँग भने, ‘विद्यालयले छुट्टीका दिन पनि पढाएका छन् र जेठसम्ममा कक्षा सक्नु विद्यालयका दायित्व हो । कक्षा सकेपछि पैसा तिर्नु विद्यार्थी र अभिभावकको दायित्व हो ।’ उनले विषय पढाइ भइसक्ने भएपछि रकम तिर्नु अनिवार्य रहेको भन्दै गैरजिम्मेवारीपूर्ण जवाफ दिए ।

विद्यार्थीहरुको माग जायज भएपनि यहाँका निजी कलेज सञ्चालकहरु यस विषयमा मौन रहेका छन् । कलेज सञ्चालकहरुले भने विषय अध्यापन गराइसकेपछि शुल्क लिन पाइने, आफूहरुले शिक्षक, कर्मचारीलाई तलब दिनुपर्ने भएकाले विद्यार्थीबाट शुल्क लिनुपरेको भन्दै रेडिमेट जवाफ दिने गरेका छन् ।

मंगलबार इटहरी उपमहानगरपालिका, हिसान सुनसरी र विद्यालय प्रशासनबीच छलफल भएपनि यकिन निर्णय नहुँदा उपमहानगरपालिका परिसरमा भेला भएका विद्यार्थी निराश भएर घर फर्किएका छन् ।