इटहरी : कोरोना महामारीका कारण लकडाउनको समयमा शिक्षकलाई तलव नै नदिएका इटहरीका निजी कलेज सञ्चालकहरुले विद्यार्थीलाई भने धम्क्याएर शुल्क लिने गरेको खुलेको छ ।
एक हप्ता अगाडिदेखि लकडाउनको शुल्क लिन नहुने भन्दै आन्दोलनमा उत्रिएका विद्यार्थीहरुलाई कलेज सञ्चालकहरुले पटक–पटक धम्की दिएर शुल्क लिन दबाब दिदैैँ आएको छ । शिक्षक, कर्मचारीलाई तलव दिनुपर्ने भन्दै विद्यार्थीसँग शुल्क मागेपनि शिक्षकलाई लकडाउनको हालसम्म तलव नदिएको स्वयम् शिक्षकहरुले बताउँदै आएका छन् ।
कलेजले शिक्षक, कर्मचारीलाई तलव दिनुपर्ने भन्दै विद्यार्थीबाट एक वर्षकै शुल्क उठाउन बाध्य भएको निजी कलेज सञ्चालकहरुले जिकिर आएका छन् । यद्यपि, कलेजले भने लकडाउनको समयको भने शिक्षक र कर्मचारीलाई तलव नदिएको स्वयम् शिक्षकहरुले बताउँदै आएका छन् । उनीहरुले खुलेर नबताएपनि नाम नखुलाउने शर्तमा हालसम्म कोरोनाकालको तलव नपाएको र अहिले विद्यार्थीसँग आँफूखुशी शुल्क असुल्ने गरेको बताउँदै आएका छन् ।
शुक्रबार यहाँका विश्वआदर्श, कस्तुरी, कोशी, शुष्मा, लगायतका कलेजमा अध्ययन गर्ने सयौँ विद्यार्थीहरुले इटहरीको मुख्य चौक, उपमहानगरपालिका परिसरमा आन्दोलन गरेर सडकमा चक्काजाम समेत गरेका थिए । बिहीबार इटहरी उपमहानगरपालिका, हिसान सुनसरी र कलेज प्रशासनबीच दा्रेसो चरणको बैठक बसिएको भएपनि कुनै निर्णय नआएपछि आफूहरु पुनः आन्दोलनमा उत्रिएको विश्व आदर्श कलेजका विद्यार्थी नीमा तामाङले बताए ।
इटहरी उपमहानगरपालिकाका शिक्षा शाखा प्रमुख सूर्यप्रसाद सुवेदीले भने बिहीबारको बैठकमा उपमहानगरपालिकाले असोज महिना यताको मात्रै शुल्क लिन भनेको थियो । तर, हिसान सुनसरीका अध्यक्ष मुकुन्द घिमिरेले भने १२ महिनाको नै शुल्क लिनुपर्ने भन्दै बैठकबाटै उठेर हिनेका थिए । शिक्षा शाखा प्रमुख सुवेदीले निर्णय सुनाउने बित्तिकै हिसान सुनसरीका अध्यक्ष घिमिरे र शुष्मा कलेजका सञ्चालक बोधराज नेपाल बैठकबाटै बाहिरिएका थिए ।
शुल्कको विषय राष्ट्रिय मुद्दा भएकोले आफूहरूले शुल्क नघटाउने र कोर्ष सकेको रकम लिएको भन्दै निजी कलेज सञ्चालकहरुले जिकिर गर्दै आएका छन् । आफूहरुको माग सम्बोधन नभएपछि शुक्रबार विद्यार्थीहरुले इटहरी उपमहानगरपालिका घेराउ समेत गरेका थिए । मानवीय यातना दिएर विद्यार्थीसँग शुल्क उठाइरहेको विद्यार्थीहरुको आरोप छ ।
सहमति जुट्न नसकेपछि विद्यार्थीहरुले शुक्रबार नै विश्व आदर्श, कस्तुरी, कोशी र शुष्मा तालाबन्दी गरेका छन् । आक्रोशित विद्यार्थीले शुष्मा कलेजको गेट नै भत्काइदिएका थिए । इटहरीमा पहिलोपटक निजी कलेजका विद्यार्थी यसरी आन्दोलनमा उत्रिएका हुन् । उनीहरुको मागलाई विद्यार्थी संगठनले पनि साथ दिएका छन् ।
निजी कलेजका विद्यार्थीहरुको आन्दोलनलाई एमाले निकट अनेरास्ववियू, कांग्रेस निकट नेविसंघ र माओबादी निकट अखिल क्रान्तिकारीले विज्ञप्तीमार्फत समर्थन जनाएका छन् । हिसान सुनसरीले भने गत आइतबार आन्दोलनको कुनै औचित्य नभएको र कुतर्कको पछि नलाग्न भन्दै विद्यार्थीको आन्दोलनलाई कुतर्कको संज्ञा दिएको थियो ।
Discussion about this post