इटहरी : सरकारको निर्णय उल्लघंन गर्दै इटहरीमा विद्यालय सञ्चालनमा आएका छन् । सोमबार मन्त्रिपरिषद्को बैठकले वैशाख महिनाभर विद्यालय बन्द गर्न निर्णय गरेपनि इटहरी उपमहानगरपालिकामा सञ्चालित विद्यालयले भने निर्णय उल्लघंन गर्दै मंगलबार आफूखुशी विद्यालय सञ्चालन गरेका हुन् ।
इटहरी उपमहानगरपालिकाका शिक्षा शाखा प्रमुख सूर्यप्रसाद सुवेदीका अनुसार मन्त्रिपरिषद्को निर्णय कार्यान्वयन गर्ने सम्बन्धमा मंगलबार बैठक बसिएको र परीक्षाको तयारी अघि सारिएको छ ।
‘विद्यालय सञ्चालक र सम्बन्धित मानिसहरुसँग बैठक बसेर परीक्षाको तयारी अघि सारेका छौँ,’ सुवेदीले भने, ‘परीक्षा बाहेक अन्य पठनपाठन बन्द गर्ने सरकारको निर्णय भएअनुरुप आन्तरिक मूल्याङ्कन र प्रयोगात्मक परीक्षा लिने भन्ने विषयमा निर्णय भएको छ ।’
उनका अनुसार बुधबारदेखि तीनदिनसम्म आन्तरिक मूल्याङ्कन र प्रयोगात्मक परीक्षा लिनका लागि तयारी अघि बढाउने र ११ गतेदेखि १५ गतेसम्म पठनपाठन बन्द गर्ने निर्णय भएको छ ।
साथै, १६ गतेदेखि भने वैशाख मसान्तसम्ममा सबै परीक्षा सक्नुपर्नेगरी निर्णय भएको सुवेदीले बताए । उनले टाकुरासँग भने, ‘यसअघि कक्षा ५ र ८ को परीक्षा नगर शिक्षा समितिले जेठ २ गते लिने तयारी थियो, तर पछिल्लो केहीदिनयता कोभिडको संख्या बढ्दै गएपछि आगामी १९ गतेदेखि फाइनल परीक्षा गराउने तयारी गरिएको छ ।’
एसईई, ११ र १२ कक्षाको भने राष्ट्रिय परीक्षा बोर्डले नै निर्णय गरेकाले आफूहरुले कुनै निर्णय गर्न नमिल्ने बताउँदै उनले बाँकी रहेका अन्य कक्षाका भने १६ गतेदेखि मसान्तसम्म फाइनल परीक्षा लिनेगरी तयारी अघि बढाइएको सुवेदीले बताए ।
‘हामीले आन्तरिक व्यवस्थापन अघि सारेर फाइनल परीक्षा लिनेगरी निर्णय गरेका छौँ,’ उनले भने, ‘आज एक पत्र जारी गर्दै शिक्षा शाखाले सो निर्णय गरेको छ ।’
मंगलबार इटहरीका सबैजसो सामुदायिक तथा निजी विद्यालयहरुले अध्यापन गराएका थिए । सरकारले प्रदेश १ को इटहरीसहित धरान, विराटनगर, मेचीनगर, बिर्तामोड, दमकमा विद्यालय, कलेज ट्युसन सेन्टर र तालिम केन्द्र बन्द गर्ने निर्णय गरेको थियो ।
उता, हिसान सुनसरीका अध्यक्ष मुकुन्द घिमिरेका अनुसार यसअघि जेठ लागेपछि मात्रै परीक्षा गर्ने कुरा भएपनि तत्काल परीक्षा गर्नका लागि इटहरी उपमहानगरले निर्देशन दिएबमोजिम तयारी अघि बढाइएकोछ ।
‘जेठमा जाँच गर्न नसकिने पूर्वानुमान गरेकाले हामीले तीनदेखि चारदिन विद्यालय सञ्चालन गर्ने र परीक्षा लिने निर्णय गरेका हौँ,’ घिमिरेले टाकुरासँग भने, ‘११ र १२ कक्षाको भने सम्भव भएसम्म भौतिक नभए अनलाइन कक्षा पढाउने तयारी गरेका छौँ ।’
उनका अनुसार सुनसरीका १२ वटा स्थानीय तहमा दुई सय भन्दा बढी विद्यालय सञ्चालनमा छन् । तर, इटहरीमा मात्रै उक्त निर्णय भएको र अन्य पालिकामा पनि छलफलको प्रक्रिया अघि बढाइएको उनले जानकारी दिए ।
अन्य पालिकाहरुमा समन्वय गरिरहेकाले केहीदिनमा निर्णय आउने उनले बताए ।
यद्यपि, धरान उपमहानगरपालिकाले भने मंगलबार साँझ बिहीबारदेखि पूर्णरुपमा विद्यालय बन्द गर्ने निर्णय गरेको छ । वैशाख १४ गतेखि २४ गतेसम्म परीक्षा सक्ने र तत्काल बिहीबारदेखि पूर्णरुपमा विद्यालय बन्द गर्ने निर्णय गरेको हो ।
Discussion about this post