इटहरीमा मुख्य सडकमै पार्किङ

इटहरी : इटहरीमा सडकमै पार्किङ गर्दा यातायातमा समस्या उत्पन्न भएको छ । इटहरीका मुख्य चौक आसपास तथा निर्माणाधीन ६ लेन सडकमै सवारी पार्किङका कारण यातायातमा समस्या उत्पन्न भएको हो ।

मुख्य चौकको पूर्व लाइन, पश्चिम लाइन, धरान लाइन तथा विराटनगर लाइनमा सडकमै पार्किङ गरिदाँ यातायात सञ्चालनमा कठिनाई हुँदै आएको छ ।

सडक डिभिजन कार्यालय, स्थानीय सरकार र ट्राफिक प्रहरीले अन्तरक्रिया गरी यसको तत्काल समाधान हुनुपर्ने इटहरीका आर्यन सुवेदी बताउँछन् । उनले भने, ‘निर्माणाधीन ६ लेन सडक पूरा हुन नपाउँदै आधा भागमा पार्किङ गरिएको छ, हामीलाई गाडी चलाउन मात्रै होइन, बाटो हिड्दा पनि असहज भइरहेको छ ।’

पूर्वको ब्यापारिक केन्द्र मानिएको इटहरीमा पछिल्लो समय ठूला कम्प्लेक्स र सपिङ महलहरु सञ्चालनमा आउने क्रम तीव्र रहेपनि पार्किङ स्थल नहुँदा झमेला हुने गरेको उनको भनाइ छ । इटहरीमा भएको जथाभावी पार्किङका कारण यातायातमा मात्रै नभइ आम मानिसको आवतजावतमा पनि समस्या उत्पन्न भएको उनी बताउँछन् ।

पूर्व क्षेत्रीय ट्राफिक प्रहरी कार्यालय प्रदेश १ का प्रमुख प्रहरी उपरीक्षक (एपसी) सञ्जीव शर्माले सडकमा पार्किङ गरेका कारण यातायात सञ्चालनमा कठिनाई भएको बताए ।

उनले भने, ‘ट्राफिक प्रहरीले यातायातसँग मात्रै सम्बन्धित कुरा निगरानी गर्ने हो, बाटो अबरुद्धको विषयमा स्थानीय तहले हेर्ने हो, तर हाल पार्किङको सम्बन्धमा ट्राफिक प्रहरीले दैनिक व्यापारीहरूसँग झगडा गर्नुपर्ने स्थिति छ ।’

उनका अनुसार ठूला व्यापारिक भवनमा समेत पार्किङ स्थल नहुँदा सडक अबरूद्ध भइरहेको छ । व्यापारीहरुले आवाज उठाएको अवस्थामा आफूहरूले एकतर्फी पार्किङ सञ्चालन गर्नका लागि समन्वयकारी भूमिका निर्वाह गर्ने शर्माले बताए ।

उनले भने, ‘मुख्य राजमार्गमै पार्किङ हुँदा हाल समस्या हुँदै आएको छ, अन्य साना तथा भित्री सडकहरुमा एकतर्फी पार्किङ गर्ने अभ्यास समेत सञ्चालन गरिरहेका छौँ ।’

ट्राफिकले मुख्य राजमार्ग बाहेकका अन्य स्थानमा भने एकतर्फी पार्किङ बनाउन पहल गरिरहेको र मुख्य राजमार्गमा भने पार्किङ नगर्नका लागि पटकपटक अपिल गरिरहेको उनले बताए ।

वर्षदिन अघि इटहरी उपमहानगरपालिका वडा नं. ६ का वडाध्यक्ष दीपक गौतमको अध्यक्षतामा कार्यदल बनाएर पार्किङ समस्या निरूपण गर्न प्रयास गरिएपनि अहिलेसम्म यसको समाधान भएको छैन ।

इटहरी उपमहानगरपालिकाले वडा नं. ४ ट्याङ्ग्रा खोला नजिकै स्मार्ट पार्किङ बनाउने अवधारणा बनाएपनि हालसम्म सुरू भएको छैन । उक्त स्मार्ट पार्किङमा ६ सय वटा सवारी साधन पार्किङ गर्न सकिने बताएपनि निर्माण कार्य अहिलेसम्म सुरु नहुँदा मुख्य क्षेत्रमा समस्या भएको हो ।