मोरङ : मोरङको विराटनगर महानगरपालिकाका विभिन्न स्थानहरूमा चोरी गर्ने दुईजनालाई प्रहरीले पक्राउ गरेको छ । पक्राउ पर्नेमा विराटनगर ११ का २९ वर्षीय संजय भन्ने अंगत चौधरी र विराटनगर ६ का ३१ वर्षीय सन्तोष दास रहेका छन् ।
जिल्ला प्रहरी कार्यालय मोरङबाट खटिएको विशेष प्रहरी टोलीले उनीहरुलाई आफ्नै घरबाट पक्राउ गरिएको हो ।
पक्राउ परेका दासको साथबाट ५५ हजार ७ सय ५० नगद र चौधरीको कोठाबाट कोनिका कम्पनीको टिभि थान १, कानमा लगाउने झुम्का थान ३, एलसिडि टिभि थान १, मोबाइल थान २, फलामे कराई थान १, फलामे औजार थान ४, चाँदीको सिक्री थान १ र नेपाली नगद ५ लाख ८ हजार ७ सय ३ सहित पक्राउ गरेको हो ।
प्रहरीले थप अनुसन्धान गर्ने क्रममा गत जेष्ठ ९ गते विराटनगर ११ का विनोदकुमार नुनियाले संचालन गरेको महाविर इलेकट्रिक पसलमा भेन्टिलेशन फुटाई नगद ६५ हजार, गत जेष्ठ ११ गते विराटनगर १५ बैंकरोडका समीर लामाको पसलमा राति झ्याल फुटाई नगद ८९ हजार एक सय ४५ र २ वाट मोबाइल, त्यस्तै, गत जेष्ठ १६ गते विराटनगर ९ महेन्द्र चौक स्थित अनिस रिजालले संचालन गरेको पसलबाट ढोका फुटाई धाराको टुटी ७ थान र गत जेष्ठ १५ गते विराटनगर ९ रामजानकी पथका बिरेन्द्र कुमार मण्डलले संचालन गरेको आभुषण ज्वेलर्स सुनचाँदी पसलबाट पछाडि छतबाट पसलमा प्रवेश गरी सुन २४ ग्राम, चाँदीको पूजाको भाडा ३५० ग्राम, नगद १७ हजार र ग्याँस सिलिण्डर एक थान चोरी गरेको खुलेको छ ।
पक्राउ परेकाविरुद्ध चौधरी र दासलाई चोरी कसूरमा थप अनुसन्धान कार्य भइरहेको जिल्ला प्रहरी कार्यालय मोरङले जनाएको छ ।
Discussion about this post