इटहरी : इटहरी उपमहानगरपालिकाका मेयर द्धारिकलाल चौधरीले सेवाग्राहीमाथि अमानवीय र अलोकतान्त्रिक काम गरेको भन्दै कांग्रेसले आपत्ती जनाएको छ ।
इटहरी कांग्रेसका सभापति हेमकर्ण पौडेलले मेयर चौधरीले अब सजाय भोग्न तयार रहनुपर्ने बताएका छन् ।
‘निर्वाचित नगरप्रमुखबाट कानूनलाई हातमा लिएर जून अश्लिलता प्रकट भएको छ, यो खेदजनक छ,’ पौडेलले भने, ‘मेयरले अब कानूनी सजाय भोग्न तयार रहनुपर्छ ।’
कार्यालयमै बोलाएर सेवाग्राहीलाई अश्लील रुपमा थुनिनुले कांग्रेसको गम्भीर ध्यानाकर्षण भएको उनले बताए । मेयर चौधरीको कार्यकक्षमा बुधबार साँझ तालाबन्दी गर्दै कांग्रेस सभापति पौडेलले भने, ‘मानिसलाई कार्यालयमै बोलाएर थुन्नु भनेको अत्यन्तै अनैतिक, अमर्यादित, अमानवीयताको पराकाष्टा हो, हामी बिहीबार मेयरलाई उपमहानगर प्रवेश गर्न नदिनका लागि आन्दोलन गर्छौँ ।’
मेयर चौधरीले केहीदिनयता विभिन्न ठाउँमा बनाएका संरचना ऐलानी जग्गामा बनाएको भन्दै डोजर आतंक गर्नु अत्यन्त खेदजनक रहेको पौडेलले बताए । आफूसँग फरक विचार राख्ने मानिसहरुले बनाएको संरचना मेयरले जथाभावी रुपमा भत्काउनु अस्वभाविक रहेको उनको तर्क छ ।
बुधबार इटहरी ४ का यामप्रसाद ढकाललाई कार्यालयमै बोलाएर मेयर चौधरीले पैनीमाथि घर किन बनाएको भन्दै धम्कीपूर्ण शैलीमा थुनेका थिए ।
‘सातदिनभित्र घर भत्काउने कि थुनिदिउँ भनेपछि मैले आफ्नो घर किन भत्काउने भनेर मेयरलाई प्रश्न गरेको हुँ,’ पीडित ढकालले भने, ‘घर नभत्काउने भनेपछि नगर प्रहरीद्धारा अमानवीय व्यवहार देखाएर दुई घण्टासम्म थुनिएको छ ।’
मेयर चौधरीले तत्काल थुन्न भन्दै नगर प्रहरीलाई निर्देशन दिएका थिए । दिउँसो ३ बजेदेखि उनलाई दुई घण्टासम्म नगरको एक कक्षमा थुनिएको थियो ।
साँझ ५ बजे नेपाली कांग्रेस इटहरीको नेतृत्वमा इलाका प्रहरी कार्यालय इटहरीले उद्धार गरी उनलाई परिवारको जिम्मा लगाएको छ ।
यो पनि – इटहरीका मेयरले कार्यकक्षमै सेवाग्राही थुने
यो पनि – इटहरीका मेयरको कार्यकक्षमा तालाबन्दी
यो पनि – इटहरीका मेयरको डोजर आतङ्क फेरि सुरु, भन्छन्, ‘कहाँ–कहाँ हान्ने भनेर अहिले भन्ने होइन’
Discussion about this post